Covid-19 vei enkawl lai Mi 2,372 (1.76%) an awm

December 14, Thawh-lehni khan Mizoramah Covid-19 vei mi 234 hmuh chhuah a ni. Nimin khan hripui vei dam tawh mi 302 chhuahtir an ni a, hripui vangin mi pathum an thi. Nimin tlai dar 5 dinhmun angin, Mizoramah Covid-19 vei enkawl lai mi 2,372 an awm a, positive hmuh tawh aṭangin 1.71% chiah a ni tawh.

Covid-19 vei Thawh-lehnia hmuh thar mi 234-te chu mipa 89 leh hmeichhia 145 an ni a; ZMC laboratory-a hmuh chhuah 24, TrueNAT-PCR hmanga hmuh 21 leh RAT hmanga hmuh 189 an ni.

IDSP record angin, Mizoramah Covid-19 vei 1,38,847 hmuh chhuah a ni tawh a, mipa 66,979 leh hmeichhia 71,868 an ni a, mipa aiin hmeichhia 4,889-in an tam zawk. Nimin tlai dar 5 thleng khan mi 1,35,956 (97.91%) chhuahtir an ni tawh a, mi 529 (0.38%) thi tawhin, enkawl mek mi 2,372 (1.71%) an awm.

December 14, Thawhlehnia Covid-19 vei hmuh thar mi 234 zingah symptom nei mi 122 an awm a, mi 112 erawh chuan symptom an nei lo. Thawhlehnia swab sample endikah positivity percentage 10% aia a sanna district pathum chiah a awm a, positivity rate sanna ber Khawzawl district-ah 19.59% a tling. Positivity rate 10% chung lam district dangte chu Champhai 15.38% leh Mamit 12.74% a ni.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. December 14, 2021 thlenga swab sample endik tawh 14,72,653 aṭanga RT-PCR hmanga endik zat percentage chu 22.27 a ni a, RAT hmanga endik zat chu 71.84% a tling.

Kum 2011 chhiarpui aṭanga chhûtin, Mizorama Covid-19 vei hmuh tawh 1,38,847 chu mi 1,000 zelah hripui vei mi 126 an awm ang a ni a; mi 1,00,000 zela Covid-19 vangin mi 47 an thi tawh ang a ni tih sorkar thuchhuakin a tarlang.

Nimin khan tlai dar 5 thlengin hripui vei dam tawh mi 302 chhuahtir an ni a; Aizawl district-ah mi 170, Lunglei district-ah 27, Serchhip district-ah 26, Hnahthial district-ah 21, Lawngtlai leh Khawzawl district-ah 15 ve ve, Mamit district-ah 12, Champhai district-ah paruk leh, Kolasib leh Saitual district-ah panga ve ve an chhuak a ni.