State Credit Seminar buatsaih
National Bank for Agriculture and Rural Development (NABARD) chuan nimin khan Regency Hotel-ah State Credit Seminar 2022-23 an buatsaih a, Agriculture minister C Lalrinsanga'n hmanpuiin, State Focus Paper 2022-23 a tlangzarh.
C Lalrinsanga chuan, NABARD-in lo neih leh ran vulha eizawngtute leh thingtlanga chengte tan thil ṭha an tih chu mipui leh sorkarin an hlâwkpui tih sawiin, "RIDF leh scheme dangte aṭangin ṭanpuina leh loan chi hrang cheng vbc. 1,000 chuang NABARD aṭanga dawn a ni. Annual Credit Plan atana kum 2020-21 chhunga cheng vbc 1,800 bawr ruahman aṭanga 73% (cheng vbc 1,324) tihfel a ni hi a lawmawm hle," a ti a; kum 2021-22 atana Annual Credit Plan ruahman chu 100% tihfel a nih theih nan ṭan la turin a chah.
State Focus Paper kaltlanga Mizoram economy siam ṭhatna tura NABARD-in ruahmanna a siam thu sawiin Minister chuan, "Hengte hi bank ṭanpuina tel lo chuan a takin a thleng thei dawn lo. Loneih leh a kaihhnawih atan loan tam zawk pek a pawimawh a, bank-te'n a bik takin ngai pawimawh se," a ti.
NABARD-in India hmarchhak puma regional rural bank zinga Best Performing RRB Award a siam chu Minister hian Mizoram Rural Bank (MRB) chairman V Jaya Chandran hnenah a hlân a; SHG hna thawk ṭha pathum thlan chhuah leh hemi kawnga bank thawk ṭha pahnih thlante hnenah lawmman a hlan bawk.