Covid-19 vangin mi 529 thi tawh

Nimin khan tlai dar 5 thlengin Covid-19 vangin mi pathum an thi a, natna dang nei tel vek an ni. December 11-a thi, nimina tarlan thar mi pakhat a awm bawk. Nimin tlai dar 5 thleng khan Mizoramah Covid-19 vangin mi 529 an thi tawh a, December thla chhungin mi 32 an thi tawh.

December 11, 2021 chhun dar 12:45 khan Vanliana (69), Thingsulthliah chu hripui vangin State Referral Hospital-ah a thi a; Covid-19 positive a ni tih November 22, 2021 khan hmuh chhuah niin, November 24 aṭangin SRH-ah enkawl a ni.

Thangliani Sailo (83), Champhai Bethel Veng chu nimin zing dar 6:15 khan Champhaia dedicated covid health centre-ah a thi a; Covid-19 vei a ni tih December 10, 2021 khan hmuh chhuah a ni.

Nimin chawhma dar 11 khan VL Thlengliana (19), Serchhip chu State Refferal Hospital-ah a thi a; Covid-19 positive a ni tih December 8, 2021 khan hmuh chhuah niin, SRH-ah dah luh nghal a nih thu sorkar thuchhuakin a tarlang.

R Johnson-a (62), Vairengte pawh nimin chhun dar 12:45 khan hripui vangin Kawnpui damdawi-in (PHC)-ah a thi a; Covid-19 vei a ni tih December 12, 2021 khan hmuh chhuah a ni a, SRH-a enkawl tura hruai a nih laiin a chauh zual avanga Kawnpui damdawi-inah luhpui a ni a, a thi zui a ni.