Thu dik duhin FIR thehluh a ni - Robert Romawia Royte

Minister of state Robert Romawia Royte chuan, tun hnaia Sihṭhiangah rawngbawltute nen chaw an eiho thu sawiin, "Kan chaw eina in neitu chu Synod Mission Board (SMB) evangelist (rtd) upa Manika a ni a, upa dang pathum pawhin an rawn ei ve," a ti.

Aizawl East-II Block MNF-te'n minister kum thum a nihna lawmpuina an buatsaihah Robert Romawia chuan, "Sihṭhianga chaw kan einaah hian zu kan in ni àwma ngaih theiha thu theh darh an awm a, thu dik hâi lan kan duh avangin FIR kan thehlut. FIR kan thehluh lai hian political party mi a nih rin ngaihna kan nei lo a, mante an awm takah chuan political party pakhat chuan an party mi angin an sawi a ni," a ti a, party mi leh saa an ngaih loh thu a sawi.

Robert Romawia chuan, MNF party-in zu an duh lo tih sawiin, "Kan party leh sorkara nihna thleng pawha nghawng thei a nih avangin kan ngai thu tak. Social media-ah hian beih ka tâwk nasa a, ni tin mai ka tâwk. Ka ngai thu tak ngai lo a, kan tawn turah pawh ka ngai. Thu dik hriat chhuah ngei kan duhna chhan chu kohhran leh zu sawi zawmna a ni a, Sihṭhiang lama kohhran upate rilru a ná a ni," a ti.

Kohhran duh loh zawng ti tawh ṭhin party bawkin a PS, kohhran upa mantir an tum nia sawiin Robert Romawia chuan, "Police-te hian dan an hre em em a, man àwm chu an hria. Kohhran upa min, a thil tihsual mantir tumte hi kohhran chona a ni. Political party-te inngaihtuah ṭha se ka duh a, an FIR hi withdraw ngei se ka duh," a ti a; FIR withdraw a nih chuan an bial chhunga kohhran upa leh rawngbawltute rilru a dam deuh tur thu a sawi.

Robert Romawia chuan, Teirei lei vengtu chu a naute'n an kut hmáwr pawha an tawh loh thu sawiin, "Ka PSO-in lei vengtu kha a ruih deuh avangin Bairabi-ah medical test tihtir ṭha a ti a, motor-a luhtir tur chu a identity card-te a pawh thlaksak a ni. A tirah leia duty tih kan hre lo a, kan hriat hnuah a service thlengin a tuar thei dawna kan hriat avangin medical turin kan hruai ta lo. Kut hmáwr pawha an khawih lo kha ka naute an fakawmin an chhuanawm ka ti tak zet a ni," a ti.