Kolasib dist-a hri danna pek sawiho

Kolasib bawrhsap Dr H Lalthlangliana kaihhruaiin nimin khan DC pisaah District Tuberculosis (TB) Prevention Treatment Committee leh District Task Force on Immunization-te an ṭhukhawm a; kum 2021-22 chhunga an hmalaknate an thlir let bakah, hmachhawpte an sawiho.

Ṭhutkhawma tarlan danin, Kolasib district-ah December 14, 2021 thleng khan Covid-19 vaccine dose khatna 51,210 leh dose hnihna 39,116 pek a ni tawh a, vaccine la thei tur mi 55,499 chhinchhiah aṭangin dose khatna la tawh chu 92.27% an tling.

Har Ghar Dastak (door to door) vaccination kalpui mekah khaw 26 tlawh chhuah tawh aṭangin Covid-19 vaccine dose khatna 141 leh dose hnihna 447 pek a ni tawh bawk.

Intensified Pulse Polio Immunization Programme 2022 chu January 25, 2022 aṭangin kalpui ṭan turin an rél a; naupang kum 5 hnuai lam 9,490 hnenah immunization booth 107 kaltlangin zeng hri danna pek tum a ni.

Ngawr (TB) natna lan chhuah dan, endik dan leh enkawlna kalpui dante thlirho a ni a; TB vei hmuh chhuahte bakah, an chenpuite nena enkawlna pek an nih dante ngaihthlak a ni. Kum 2021 chhungin TB vei 127 enkawl an nih thu an tarlang.

December 2021 aṭangin Programmatic Management of TB Preventive Treatment (PMTPT) kalpui a ni a; kum 2021-22 chhunga second quarter leh third quarter chhunga TB enkawlna kalpui ṭha berah Kolasib district thlan a nih thu tarlan a ni bawk.