Tun dinhmunah district hawn belh Tumna a awm lo - Home Minister

Home minister R Lalzirliana chuan, tun hnaia amah kâwmtu thuthar thehdarhtute hnenah, tun dinhmunah district thar hawn belh tumna a awm rih loh thu a sawi.

R Lalzirliana chuan, district ṭhen leh district ramri chungchang ngaihtuah tura Mizoram sorkarin a din, District Re-organization Committee chuan an thil hmuh dan sorkara an thehluh tawh thu a sawi a, "District thar din tur hian sum ṭhahnem tak a ngaih belh dawn avangin tun dinhmunah chuan district thar din chu rem rih loa an ngaih thu an thlen a ni," a ti.

June 16, 2016-a GAD notification hmangin District Re-Organisation Committee chuan July 17, 2017 khan sorkarah report an thehlut a ni.

Home Minister sawi danin, District Re-organization Committee chuan an report-ah hian district thar siam belh theih a nih dawn loh avangin sub-division headquarters hrang hrangte tichangtlung tura ṭan lak a rawt a ni. Chumi tihhlawhtling tur chuan Mizoram sorkarin theihtawp a chhuah mek a, sub-division office te, thawktu quarters leh thil pawimawh dangte chei ṭhat mek a ni.

Tunah hian Saitual sub-division pisa leh quarters-te pawh chei ṭhat mek a ni a, SDPO pawh dah a ni dawn. Chutiang bawk chuan hmun hrang hranga civil sub-division ṭhuthmunte tichangtlung turin theihtawp chhuah a ni.

Zawhna chhangin GAD hotute chuan, civil sub-division awm sate leh a tharte chu tun thlengin sorkarin mumal taka a thuam hleih theih loh thu an sawi a, "Building, thawktu, lirthei leh thil dangte an nei changtlung lo hle a, mumal takin tun thlengin thuam an la ni lo," an ti a; civil sub-division-te thuam ṭhat hna chu sorkar hmachhawp pawimawh tak a nih thu an sawi.

NEDP hnuaiah 'Scheme for Upgradation of Administrative Infrastructures' duan a nih thu sawiin GAD hotute chuan "He scheme aṭang hian kum 2917-18 atan cheng nuai 1,500 dah a ni. Heta ṭang hian district leh civil sub-division-te infrastructure mamawh eng emaw zat tihchangtlun tura hmalak a ni ang. Delegation of functions leh staffing-te hi mumal zawka kalpui tura ruahman a ni a, he hmalaknaah hian Saitual, Hnahthial leh Khawzawl pawh a tel a ni," an ti.

Tarlan tawh angin, September 12, 2008-a district headquarters atana puan tawh Hnah­thial, Khawzawl leh Saitual-te chuan district tihpuitlin an phût mek a; Darlawn pawhin district headquarters-a puan an phût a ni.