Thisen endikna tluantling Awm theihna tur sawiho

Mizoram State AIDS Control Society (MSACS), Aizawl Civil Hospital-a Microbiology department leh FHI360 te chuan nimin khan Agriculture directorate conference hall-ah private hospital-a HIV/AIDS chungchanga thisen endikna tluantling a awm theihna tura hmalakna atan training an buatsaih a; a kaihhnawiha thawktute an tel.

Meeting-a an tarlan danin, tun dinhmunah Central Jail bakah SHALOM (NGO) leh private hospital pasarihah HIV test chi khat, screening chauh tih theih a ni a; heng hmunte hi MSACS hnuaia thisen test leh counselling tih theihna Interated Counseling and Testing Centre (ICTC) puitling anga siam a nih theih nan thisen endikna leh HIV chungchanga counselling pek dante training-ah hian zirho a ni.

HIV kai leh kai loh hriat chian nan test chi thum tih a ngai a, chu'ng test-te chu ICTC-ah chauh tih theih a ni a; private hospital, Central Jail leh Champhai District Jail-ahte test tih theih ni mah se, first test (screening) chiah tih theih a ni. HIV test tluantling nei turin thisen endikna chi hrang hrang bakah, counselling chi hnih - pre test coun­selling leh post test counselling tih theihna tur siam a ngai a ni.