Naktuk aṭangin Kawngpui dang dawn?

Mizoram Government Lumpsum Aided Hi­gher Secondary School Association (MIGLAHSSA), School Managing Board leh Joint SU-te'n lumpsum higher secondary school (HSS) pakuate adhoc grant-in-aid dinhmuna hlángkai tura Mizoram sorkar an phûtna sorkar thu an ngaihchàn hun chu vawiin hian a tawp dawn a; thu lawmawm an dawn loh chuan naktuk, Nilaini aṭangin sikul awmna khua ṭheuhah zirna-in leh sorkar pisa zawng zawng khâr an tum bakah, kawng dan an tum.

Tarlan tawh angin, lumpsum aided HSS pakuate adhoc aided-a dah phût vang hian sikul pakua - Tuisualral HSS, Phullen HSS, Farkawn HSS, NE Khawdungsei HSS, East Lungdar HSS, Thingsulthliah HSS, Zobawk HSS, West Phaileng HSS leh Zawl­nuam HSS-te chu June 18, 2018 aṭangin khâr ṭan a ni a; sikul chawlh pangngai tel loin ni 26 chhung an khâr tawh bakah, sikul pakuaa zirlai 850 vel chuan first term an exam ve thei lo a ni.

Lumpsum aided HSS pakuaa principal te, managing board hotute leh khaw pakuaa Joint SU-te'n July 19, 2018-a an meeting-a thutlukna an siam angin, July 25 thleng sorkar thu ngaihchan a, chumi chhunga thu lawmawm an hmuh loh chuan July 26 aṭanga August 3, 2018 thleng khaw pakuaa zirna-in leh sorkar pisa zawng zawng khâr bakah, kawngpui dan an tum a ni.