MPSC one time registration leh Online application hawn a ni

Mizoram Public Ser­vice Commission (MPSC) kaltlanga sorkar hna dil turte tana online-a inziah luhna, one time registration leh online application chu nimin khan MPSC mini-examination hall-ah MPSC chairman Rev. Zosang­liana Colney-in a hawng. Online-a inziak lut duh tan www.ebharat.mizoram.gov.in ah luh tur a ni.

MPSC Chairman chuan, one time registration leh online application hman theiha peih a ni ta chu lawmawm a tih thu sawiin, "Vawi khat in register tawh tan chuan hna dang dilna pawh a hranpaa thehluh ngai loin, online-in vawi hnih/khat hmeh zeuhin dilna a thehluh theih tawh dawn a, MPSC office-a kal kher ngai loin, mahni in aṭang pawhin dilna a thehluh theih dawn a ni," a ti.

India rama state hrang hrang zinga online hmanga application thehluh theiha ruahmanna siam an la tam loh thu sawiin Rev. Zosangliana Colney chuan, "MPSC hi India rama public service commission zingah naupang te ani chunga hetiang kan nei thei hi a lawmawm hle. He awlsamna hi mipui tan liau liau a ni," a ti a; tuna MPSC-a thawk tur assistant lak turah a bul ṭan nan online application chauh hman a ni dawn tih a sawi.

MPSC Chairman sawi danin, MPSC-a assistant dilna bik online chauha tih theih tura tihah internet

ṭhat tâwk lohna vanga mi ṭhen­khatin harsatna an nei a nih pawhin, MPSC pisaah helpdesk an siam dawn a, chutah chuan online hmangin an lo tihsak thei dawn a; internet hmang thiam lo an awm a nih pawhin, chutiang mite tan chuan helpdesk chu hman ṭangkai theih tur a ni. Thingtlang lama mite tan mahnia ti mai thei lo tan common service centre (CSC)-te hman theih turah an ngai bawk.

Rev. Zosangliana Colney chuan, MPSC din tirah regular staff zat, 62 chu tun thlenga an dinhmun a la nih thu sawiin, "MPSC hian a tìrah chuan group A chiah a la a, tunah UDC chin kan la tawh a, hna kan ngah tawh em em a, tuna thawktu tam tak hi MR an ni," a ti. Thawktu mi 38 lak belh turin Chief Minister-ah an thlen tih sawiin, "Chief Minister-in âwm min tihpui a, mahse DPAR-in pali-ah min tihniamsak a, chumi hnuah Finance lamin mi tihtlemsak leh bawk a. Sorkar department ṭhenkhatin kan dinhmun an hrethiam vak lo hi mipui pawiasawina lian tak niin ka hria," a ti.

MPSC one time registration leh online application hi e-Bharat hnuaia hmalakna a ni a, sorkar laipuia Ministry of Electronics & IT hmalakna niin, Mizorama implementing agency chu Mi­zoram State e-Governance Society a ni. E-Bharat hi January 2018 khan ICT minister Zodintluanga'n a lo hawng tawh a, a hnuaiah hian Mizorama sorkar department/agency 20-te online apllication hrang hrang siam nan cheng vbc. 10.81 ruahman a ni.

Zawhna chhangin MPSC Chairman chuan, online application leh one time registration atan hian MPSC-in sum sên a nei lo a, e-Bharat project hnuai­ah a thlawna siamsak an nih thu a sawi a; online registration-ah hian qualification chauh ziah lan tur a ni rih tih sawiin, "Documentary proof a ngai tih lo a, hna dilnaah an inziak tling a nih chuan, interview hunah qualification documentary proof chu pek mai tur a ni," a ti.

MPSC one time registration leh online application hawnna inkhawm hi MPSC secretary Lal­zirmawia Chhangte-in a kaihruai a, ICT-a infomatics officer Vanlalringa'n one time registration leh online application a sawifiah a; MPSC member pahnih - C Laldina leh Lalremthanga te pawh an tel a ni.

MPSC hi kum 1991-ah din a ni a, thawktu 120 vel awmin, chu'ng zinga 60 vel chu regular an ni. Kum 2017-18 chhung khan hna chi hrang hrang 26 lakna an buaipui a ni.