Mizorama OST la mek zingah HIV+ve mi 371 an awm

Mizoram State AIDS Control Society (MSACS) leh FHI360 chuan nimin khan Whitestone Conference Hall, Ramhlun Venglaiah ruihhlo (drug)-a inchiu ṭhinte'n HIV natna an kai lohna tura Oral/Opioid Substitution Therapy (OST) damdawi pek chhuahna lama thawkte tan intuaitharna an buatsaih. He hunah hian OST la mek zingah HIV hrik pai mi 371 an awm thu an tarlang.

Ni thum awh tur OST training hi Mizoram sorkar hnuaia OST centre 13 leh NGO palia thawk doctor leh counsellor-te puala buatsaih a ni a; nimina training-ah hian FHI360 state coordinator Robert Lalrempuia Khiangte-in training buatsaih chhan leh ruihhlo tih vanga natna leh pawikhawihna chi hrang hrang a sawifiah.

MSACS joint doirector (TI) Betty Lalthantluangi chuan, OST chu HIV darh zel tur venna atana hmalakna (harm reduction strategy) pawimawh tak a nih thu sawiin, "Ruihhlo ngaite'n an mamawh dan azirin doctor-te'n an chawh anga damdawi dang ang lo takin râwt dip saa pek an ni ṭhin," a ti. SHALOM director Dr Chawnglungmuana'n drug ngawlveina chungchang a sawi thung.

OST damdawi hi Aizawl leh district khawpui tin bakah, Thenzawl, Khawzawl, Vairengte, Lengpui leh Darlawnahte centre a awm a; OST-a inziak lut tawh zawng zawng chu mi 20,309 an ni. OST treatment la zo tawh mi 2,592 leh la mek mi 1,945 an awm a; OST la mek zinga mi 371 chu HIV hrik pai an ni.