KHAWTHLIR

Hlawh pek loh pawi ti
Ṭangrual pawl, Zoram Peoples' Movement (ZPM) chuan thuchhuah siamin, Mizoram sorkar hnuaia National Health Mission (NHM)-a thawk mi ṭhahnem takin thla eng emaw zat hlawh an la mumal tawh lo tih an tarlang a; vanduaithlak an tih thu sawiin, "Sorkar laipuiin kum dang zawng aia National Health Mission-ah sum a dah tam zawk laia Mizoram sorkarin NHM hnuaia thawkte hlawh a pe thei lo hi pawi kan ti tak zet zet a ni," an ti a; a rang thei ang bera an hlawh pe turin Mizoram sorkar an ngen a ni.

Sanitation campaign
India rama state, district leh thingtlang khaw fai inelna, Swatch Survekshan Grameen 2018 atana inbuatsaihnaa bul ṭan nan Saitual khua chuan nimin khan an khaw chhung hmun hrang hrangah Sanitation Awareness Campaign an buatsaih. Campaign hi Saitual, Sihfa, Rûlchàwm leh Ruallungahte neih a ni a, khaw mipui ṭhahnem tak an tel.Saitual hian nikum khan Mizoram pumah khaw fai lawmman pathumna an dawng a ni.

Project sawifiah
Nimin khan Siaha district hnuaia Mipui mamawh Inṭâwm Ruahhmanna (MiMIR) project hnuaia inelna an buatsaiha top 20-te'n Siaha DRDA conference hall-ah an project-te a lem nen an sawifiah a, DC Harleen Kaur-i'n a hmanpui. Siaha district-ah hian MiMIR hnuaia inelnaah hian V/C 49-te'n concept paper an thehlut a, a ti ṭha 20 thlan tawh niin, a ti ṭha berin cheng nuai 100 an dawng dawn a ni.

MiMIR hrilhfiah
Nimin khan CADC Art & Culture Hall, Chawngte-ah Chakma Autonomous District Council chhunga awmte tan My Project, My NEDP - Mipui Mamawh Inṭawm Ruahmanna (MiMIR) inhrilhfiahna hun buatsaih a ni a, Lawngtlai DC N Chakhai-a'n hmanpuiin, MiMIR awmzia a sawifiah. Inkhawmah hian CADC huam chhunga mipuite'n harsatna an tawh hrang hrangte sawiho a ni.