Inbumna laka fimkhur turin mipui chah
Mizoram Police chuan thuchhuah siamin, tunlaiin bank kiosks hmangin mipui bum ṭhin an nih thu an tarlang a, bum hmang laka fimkhur turin mipui an chah.
Tunlai hian misualte'n inbum dan an hmu chhuak thar zel tih tarlangin Police thuchhuah chuan, "Hmasawnna leh dik pangngai anga lang, hriat hran harsa tak siin mipui hriatna nei tlem zawkte leh fimkhur tâwk lote'n bum an tawk mek zel a ni. Heng zinga thil thar pakhat chu bank kiosks hmanga inbumna hi a ni," a ti.
Police tarlan danin, bank kiosks awmzia chu - mipui/customer-in bank kal kher loa mahni hmun emaw remchanna zawka bank an dawr theihna tura bank-in facility an pek chhuah ṭhin hi a ni.
Pawisa dah luh, lak chhuah, bank account hawn, pawisa transfer, hun tiam chhung atana pawisa dah (fixed deposit), etc. atan bank-te chuan mipui dawr turin dan phal chhungah NBFC, NGO, mimal leh pawl tute emawte inremsiamna fel tak neiin an thawhpui ṭhin.
Bank-te hriatpuina nei si loin bank kiosks lem leh rintlak loh inbumna website/entitle ṭhenkhatte chu - digitalcsp.in, cspbankonline.com (CSP Bank Online India Pvt Ltd) leh sbisave.com (Save Solution Pvt Ltd)-te a ni a; anni hian tun hnaiah mipuite bank form fill-up tirin, pawisa an dahtir ṭhin a, mipui an bum ṭhin a ni.
Police-te chuan, bank kiosk chungchanga finfiahna/information neite chu CID(Crime) SP telephone no. 0389-2334082/2335250-ah hriattir turin an ngen a ni.