Environmental activist tana hmun hlauhawm ber Brazil!

International NGO, Global Witness chuan Brazil chu khawvela en­vironmental activist tana hmun hlauhawm ber niin an tarlang. Brazil-ah hian kum 2017 chhung khan ramngaw leh nugchan humhaltu mi 57 zet thah an ni a, Philippines (48) chuan a dawt a ni.

Global Witness chuan July 24 khan report an tichhuak a, nikum chhung khan environmental activist 207 zet tihhlum an ni. Nunna chan tam zawk hi chu hmasawnna tura project duanin ramngaw leh nungcha a tih chereu tur venna kawnga hma latute an ni. Kum 2017 khan environmental acti­vist nunna chan an tam ber kum a ni bawk.

Global Witness-a an senior campaigner Ben Leather chuan, "Khawvelah mihring kan pung zel a, mamawh pawh a sang zel a ni. Hei hian ramngaw leh nungcha te-ah pawh nghawng a nei lian zel a, chumi duh loa dodaltu te pawh nek chepin an awm chho zel a ni," a ti. Leilung humhalh duhtu te hian nghaisak an tawk nasa hle a, he thilah hian ram hrang sorkar te pawh an inrawlh niin a sawi bawk.

Brazil-ah Amazon region-ah inthahna a theng nasa ber a, 87% zet a tling. Kuminah pawh January - May thla chhung khan mi 33 zetin nunna an chan leh tawh a ni. Philippines bakah Colombia chu environmental activist tana hmun hiam lo langsar zual ram an ni bawk.