Ramri-ah Assam-in dâwr tur an sa
Assam leh Mizoram inrinaah Assam mite chuan dâwr tur paruk vel an rel mek. Tuna dawr tur an sak mekna bul velah a hma aṭangin dawr pathum a awm sa bawk.
Vairengte aṭanga Vanglaini thu dawn danin, Assam mite'n dawr tur an sakna hmun hi Vairengte auto-rickshaw ho dinna ṭhin thlang, Assam lamin field an neihna chhak velah a ni. Dawr tur an rel mekna hmunah hian dawr pathum a awm sa a, Assam lam chuan mau leh silpauline vel hmangin dawr tur dan paruk an sa leh mek a ni.
Hetih lai hian, Covid-19 vanga Vairengte auto-rickshaw ho dinna ṭhina Excise & Narcotics department (END) duty ṭhinte chu pawh lêt an ni tawh a, an aiah Mizo IR police duty tir an ni. END-te hi an checkgate-ah an duty leh tawh dawn nia thu dawn a ni bawk.