Tih dik tâwk loah ngaihdam ka dil - Health Minister

Health minister Dr R Lalthangliana hoin nimin khan Kolasib DC conference hall-ah Kolasib District Task Force on Covid-19 member te, Kolasib District Village Council Association aiawh, Chief Medical Officer office leh District Hospital-a medical officer-te leh district chhung PHC-a medical officer-te an ṭhukhawm. Minister chuan, an tih dik tâwk loah ngaihdam a dil.

Health Minister chuan, Covid-19 donaah kalphung ṭha famkim duan a buaithlak thu sawiin, "WHO leh ICMR-te pawhin he hri do nan hian an kalphung duante an tihdanglam reng a ni. Mimal leh department ang pawhin kan tih tur kan tih hmaihah te, kan tihsual leh hmalakna famkim tâwk lohna zawng zawngah ngaihdam ka dil a ni," a ti.

Dr R Lalthangliana chuan, Mizorama Covid-19 veite chu state páwn aṭanga lo haw deuh vek an nih thu sawiin, "Hri vei tam zawkte chu harsatna awm loa enkawl dam zel an ni. Mizoram chu Pathianin mal a sawm a, positive kan neihte pawh an negative chho zel," a ti a; Covid-19 do tura department hrang hrang leh tlawmngai pawlte thawhhona chu ropui a tih thu a sawi.

Health Minister chuan, Kolasib district-a khum 100 awmna damdawi-in sak vat sorkarin a ngaih pawimawh thu sawiin, "Chak taka hmalak a ni. Covid-19 hri léng vang hian Mizorama health sector tihchak leh tihchang­tlun tum mek a ni," a ti. Swab sample endik hautak rûnpui a zo tawh tih sawiin Minister chuan, "Zoram Medical College-ah tlaivar deuh thawa sample test ngai ṭhin kha tunah chuan hahdam takin an test thei ta. Sample test ngai, lo thlen belh tura beisei pawh tam tawh lo tura ngaih a ni," a ti a; state páwn aṭanga lo lut, passenger leh bungraw phur lirthei khalhtute chu RT-PCR hmanga endik zel turin sorkar a inpeih thu a sawi.

Kolasib bialtu MLA K Lalrinliana, minister of state pawhin thu sawiin, Kolasib district-a sorkar hotu te, task force leh hripui donaa hma latu zawng zawng chungah a lawm thu a sawi a, "Hmalakna hrang hrang vanga thlamuang taka nunphung pangngai kan ban mek rual hian, hri laka kan him zel theihna turin sorkarin kalphung a duante ṭha tak zawm a 

ṭul," a ti.

Covid-19 chu state chhunga awm sate'n an kai lo tih sawiin K Lalrinliana chuan, "State páwn aṭanga lo hawte'n an kai a ni ber. Chuvangin, fimkhur taka awmin kan inthlahdah tur a ni lo," a ti a; Kolasib district chu luhká a nih avangin an hah fâl thu a sawi. Inkhawm hi Kolasib DC Dr H Lalthlangliana'n a kaihruai a, damdawi-in (PHC) hrang hranga medical officer-te'n an hmalaknate an tarlang. PHC-te hnenah hian Health Minister chuan hand sanitiser, kutkawr leh hmanraw dangte a hlân a ni.