Excise ruihhlo man khawm halral a ni ; Theihtawp kan chhuahzel dawn- END Minister

Excise & Narcotics department (END) in ruihhlo chi hrang hrang an mankhawm, dan anga tihral theih tawhte chu nimin khan Bethany Multipurpose Farm, Phunchawngah halral a ni. Ruihhlo hal raltu END minister Dr K Beichhua chuan ruihhlo do kawngah theihtawp an chhuahzel dawn thu a sawi.

Ruihhlo halral puala inkhawm tawi buatsaih END jt. commissioner Z Lalhmangaiha kaihhruai inkhawmah Dr K Beichhua chuan a hmu duh tan chuan kum 3 kalta leh tuna Rangvamual dinhmunah danglamna hmuh tur a awm thu sawiin, "Hmu duh tlat lo pawh awm theih a ni. Mah se, chungmite vang chuan kan hnual phal dawn lo, theihtawp chhuahin hma kan la zel dawn," a ti.

END chu thawktu tlemte, hmanrua pawh nei ṭha lo an nih thu sawiin END Minister chuan, "Hetiang dinhmuna kan din avang hian kut kuangkuahin kan awm mai dawn em ni, a teuh lo mai. Khawvel ṭhalai, Zoram ṭhalai ngei pawhin an chhiatpui leh chhiatpui mek, chhungkaw tam tak rum tirtu hi kan enliam mai tur a ni lo," a ti a, ruihhlo do chu mitinin kan mawhphurhna-a kan ngaih a ṭul thu a sawi.

Dr K Beichhua chuan ruihhlo do kawngah NGO-te'n hma an la ṭhin chu lawmawm a tih thu sawiin, "Chutihrualin a nodal department nen nih angin pheikhairual taka pen thiam a pawimawh. Chutiang a nih loh chuan inhmuhthiam lohna a awm palh thei. Englai pawhin ruihhlo do kawngah END hi hman theih kan ni a, tupawh thawhpui turin kan inpeih reng a ni," a ti.

END asst. commissioner Peter Zohmingthanga sawi danin, NDPS Act chuan ruihhloah thlemna a san ṭhin avangin ruihhlo man te chu a rang thei ang bera dan anga tihral vat vat tur a ti a ni. Mahse, duh duhdanin a mantute'n an tiral ngawt thei loa, a tihral dan tur ruahman vek a ni.