Secondary School Games khâr a ni

38th Mizoram Secondary School Games 2021, ni thum awh chu nimin khan Ṭhuamluaia Mual, Lungleiah khar a ni a, a kharna inkhawm chu School Education minister Lalchhandama Ralte-in a hmanpui.

Lalchhandama Ralte chuan, zirna lamah Mizoramin hmasawnna rahbi a rap mek nia sawiin, "Sorkarin zirtirtu mamawh phuhrûk te, hmasawnna ruhrel ruahman te, zirtirtu training-te hripui karah a kalpui a, zirtirtu 2,000 chuang lak a ni tawh. Hindi zirtirtu 300 chuang lak result pawh tihchhuah mai a ni dawn," a ti a; SEDP kaltlangin zirtirtu post eng emaw zat hnawh khah tum a nih thu a sawi.

Secondary School Games 2021-ah hian district 11 aṭangin zirlai infiammi mipa 151, hmeichhia 128 leh zirtirtu 51 an tel a, an vaiin mi 330 an ni. Lunglei district chuan gold medal pasarih, silver medal pariat leh bronze medal pali an la a, a vaiin medal 19 lain champion an ni.