YMA-in ramri chinfel ran an duh CYMA president thar tur Lalngheta

YMA General Conference vawi 73-na chu nimin khan R Dengṭhuama Hall, Aizawlah neih a ni a, a rang lama Mizoram ramri chinfel an duh. Kum 2021-2023 chhunga Central YMA president atan Lalngheta, Hlimen thlang a ni.

YMA inkhawmpuiah hian chawhma­ah CYMA president Vanlalruata kaih­hruaiin rorel a ni a, palai 1,484 an tel. Vanlalruata chuan, YMA-in theihtawp chhuahin hma a lak thu sawiin, "Boruak a awmin team insiamin kan tlân reng a ni. Social media lamahte kan tihdarh loh avangin hma la lo anga ngaihnate pawh a awm. Sawiseltu kan nei hi lawm zawk tur a ni a, sawiselna hi haw loin, insiamṭhatna atan hman zawk tur a ni," a ti.

CYMA President chuan, YMA chu ruling party-te kuah beh tlat theih a ni tur a ni lo tih sawiin, "Opposition party-te fuihpawrh theih a ni tur a ni hek lo. YMA hi páwl dangte nen khaikhin chi a ni lo a, a tih tur reng reng thâwk leh khatah a ti phut ngai lo. Committee-in ngun leh fím taka a rêl ṭhin pawl a ni," a ti a, YMA chu nu bulh páwl a ni tur a ni loh thu a sawi.

Rorelah hian agenda pakua a awm a, pakhat tih loh chu pawm vek a ni. Sorkar khawih zingah, 'Mizoram ramri hi sorkarin a rang lama chinfel dan ngaihtuah rawh se' tih a tel.

Kum 2021-2023 kumpuan atan 'Ram leh hnam humhalh' tih an thlang a, kum 2023-a YMA General Conference neihna atan Churachandpur, Manipur an thlang a, a thlengtu tur chu Manipur Group YMA a ni.

Chawhnuah kum 2021-2023 chhunga CYMA office bearer tur thlan a ni a, president atan kum 12 chhung CYMA office bearer ni tawh Lalngheta thlan niin, post dang zawngah chuan hruaitu ngaite thlan nawn vek an ni.