Lalpa tan ṭhuthmun nghetah Mizoram hi kan dah a ngai - Zoramthanga

MNF party chuan nimin khan Vanapa Hall-ah Exodus Day an hmang. Thusawitu MNF president Zoramthanga, chief minister ni bawk chuan, Mizoram chu Lalpa tan ṭhuthmun ngheta an dah a ngaih thu a sawi.

Exodus Day vawi 50-na leh kum 2021 atana Mizo Hnam Rûn khârna inkhawm hi MNF senior vice president Tawnluia'n a kaihruai a; Zoramthanga chuan, "Pathian leh kan ram tan titute hian thil dang ngaihtuahsan thei kan ni lo. MNF hma lam hi kan ngaihtuah chian a ngai. Pathian leh kan ram tan tiin theihtawpin kan insawhngheh zel a ngai a, he ram hi Lalpa tan ṭhuthmun nghetah kan dah a ngai a ni," a ti.

MNF President chuan, December 16, 1971 khan East Pakistan sipai nuai chuang an tláwm a, MNF sipaite chu East Pakistan (tuna Bangladesh) aṭangin an chhuak vek tih sawiin, "Mangang taka kan awm laiin ṭawngṭaiin Pathian hnenah Pu Laldenga hoin kan dil a, Pathianin kan kawng tur min siamsak. Pathian leh kan ram tan tia Pathian hre renga kan awm vang a ni," a ti a; mak taka chhanchhuah an nih hriat reng nan Exodus Day an hman thu a sawi.

MNF-in kum 60-na an lawm mek tih sawiin Zoramthanga chuan, "Tui anga nghet lo ni ve ta ila, Pathian hian lalna leh thuneihna min pe lo ang. Kan nghet hi a ropui a, tui anga nghet lo kan ni ve lo. Kan fel lo chungin kan felnaah Pathianin a ruat a ni," a ti.

MNF President chuan, tih dan thar nei, kalphung thar nei nia insawi an awm tih sawiin, "Kalphung thar an chhar ngun em em a, mi tih dan pangngai thoah an lut leh. Party hming dang a chhuak leh ang a, an kawr, an pawnfèn thlakin hming mak tak tak a lo chhuak leh mai ang," a ti a; Congress party chu an chhe vek tih theih a nih tawh thu a sawi bawk.

Exodus Day hmannaah hian martarte zahna leh chibai bûk nan ngawi rengin minute khat mipui an ding a; MNF hruaitute zinga mi Lalchamliana pawhin thu a sawi. Exodus Day hi district khawpui dang ṭhenkhatah pawh hman a ni.