Vawiin aṭangin NHM-a thawkte nuar dawn

National Health Mission (NHM), Mizoram hnuaia thawkte chu Mizoram sorkarin a enkawl danah lungawi loin vawiin aṭangin tiam chin awm loin an nuar dawn a, hna an thawk dawn lo.

National Health Mission Employees Union (NEUM) hruaitute nimina ṭhukhawm chuan tiam chin awm loa nawrh an rél a, "December 9, 2021-a NEUM press release-a sorkara kan thil ngiat hrang hrangte sorkar aṭanga chhànna hmuh a nih loh avangin NHM staff zawng zawngte December 17, 2021 (Zirtawpni) aṭanga tiam chin awm loa nawrh tur a ni," an ti.

NEUM tarlan danin, an nawrhna hian sorkar damdawi-in hrang hrang, sub-centre, health and wellness centre, urban PHC, PHC, CHC, SDH leh district hospital zawng zawng leh emergency service-a thawk te, Health department pisa hrang hranga NHM hnuaia thawk zawng zawng a huam a ni.

NEUM chuan, "Kan chanvo leh hamṭhatna kan hmuh ve ngei theihna tura hetiang thlen a ngai ta hi pawi kan ti tak zet," an ti a; anmahni leh an hnathawh mamawhtute chu hrethiam turin an ngen tak meuh tih an tarlang.