KHAWTHLIR

MKHC thukhawm
Mizoram Kohhran Hruaitute Committee (MKHC) chuan nimin khan Synod Conference Centre-ah General Meeting an nei a, chairman Rev. Dr C Lalhlira'n kaihruaiin, chairman thar tur Rev. Dr Vànlalnghaka Ralte hnenah chairman mawhphurhna a hlân. He hunah hian kum khat chhunga MKHC hmalakna leh hnathawh thlìr lêt a ni a, kum 2022-a hruaitu tur, kohhran hrang hrang aiawh tur ruatte an pawm bakah, secretary Rev. R Lalrinsânga paper 'MKHC kalhmang leh hmathlîr' tih zirho a ni. MKHC hi kum 1982-a din a ni.

Thisen pe
CRPF 225 battalion chuan nimin khan Zemabawka an hmunah Aizawl Civil Hospital tan thisen unit 76 an pe. Nimin vek khan KṬP, Khatla South Vengthar Branch-in an din champha pualin an kohhran hall-ah Synod Hospital tan thisen unit 14 an pe a, petute mipa 13 leh hmeichhia pakhat an ni. Zonun Institute of Performing Art & Culture, Kolasib pawhin District Hospital-ah Krismas puala thisen pek huaihawtin, mipa pasarih leh hmeichhia pakhatin thisen unit riat an pe bawk.

Zirlai chawimawi
MZP Sub-Headquarters, Dungtlang chuan nimin khan an khaw community hall-ah zirlai ti ṭhate chawimawina hun an hmang a; HSLC, HSSLC, degree course, master degree zo thar leh Ph.D hmu thar mi 15 hnenah chawimawina an hlan. He hun hi MNF Gen.Hqrs president hruaitute'n an president Lalnunmawia Pautu hoin an hmanpui a ni.

MNF VC piang
Nimin khan Serlui bialtu MLA Lalrinsanga Ralte chuan a bial Bukvannei khuaah Congress VC member pahnih leh independent VC member pakhat chu MNF-ah a lawm lut a, hei vang hian MNF VC a piang nghal. Bukvanneiah hian VC member pathum an awm a, inthlan hnuhnung berah MNF-in VC an nei lo a, Congress leh independent VC-in MNF hi an zawm ta a ni.