Covid-19: Nilaini-ah positive rate 5.74%
December 15, Nilaini khan Mizoramah Covid-19 vei mi 177 hmuh chhuah a ni a, positivity rate chu 5.74% a ni. Nimin khan tlai dar 5 thlengin hripui vei tawh dam tawh mi 221 chhuahtir an ni a, hripui vanga thi an awm lo.
Covid-19 vei Nilainia hmuh thar mi 177-te chu mipa 94 leh hmeichhia 83 an ni a; ZMC laboratory-a hmuh chhuah 15, TrueNAT hmanga hmuh 29 leh RAT hmanga hmuh 133 an ni.
IDSP record angin, Mizoramah Covid-19 vei 1,39,024 hmuh chhuah a ni tawh a, mipa 67,073 leh hmeichhia 71,951 an ni a, mipa aiin hmeichhia 4,878-in an tam zawk. Nimin tlai dar 5 thleng khan mi 1,36,167 (97.94%) chhuahtir an ni tawh a, mi 530 (0.38%) thi tawhin, enkawl mek mi 2,327 (1.68%) an awm.
December 15, Nilainia Covid-19 vei hmuh thar mi 177 zingah symptom nei mi 80 an awm a, a tam zawk, mi 97 erawh chu symptom nei lo an ni. Nilainia swab sample endikah positivity percentage 10% aia a sanna district pali a awm a, positivity rate sanna ber Serchhip district-ah 14.43% a ni. Positivity rate 10% chung lam district dangte chu Mamit 14.29%, Khawzawl 10.47% leh Lunglei 10.07% a ni a; Kolasib-ah 0.82% leh Saitualah 0.91% chiah a ni thung. Siaha district-ah hripui vei hmuh a ni lo.
Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. December 15, 2021 thlenga swab sample endik tawh 14,75,739 aṭanga RT-PCR hmanga endik zat percentage chu 22.25 a ni a, RAT hmanga endik zat chu 71.87% a tling.
Kum 2011 chhiarpui aṭanga chhûtin, Mizorama Covid-19 vei hmuh tawh 1,39,024 chu mi 1,000 zelah hripui vei mi 126 an awm ang a ni a; mi 1,00,000 zela Covid-19 vangin mi 48 an thi tawh ang a ni tih sorkar thuchhuakin a tarlang.
Nimin khan tlai dar 5 thlengin hripui vei dam tawh mi 221 chhuahtir an ni a; district tina chhuak zat chu - Aizawlah 67, Serchhipah 33, Lungleiah 32, Hnahthialah 21, Champhaiah 17, Khawzawlah 12, Siahaah 11, Saitualah 10, Lawngtlai leh Mamit paruk ve ve leh Kolasib-ah panga an ni.