Kohhrana rawngbawltute beiah MNF party-in Congress an puh

MNF party chuan thuchhuah siamin, Cyber Crime Police-a FIR thehluh kal zelah Congress party-in kohhrana rawngbawltute an bei leh chu pawi an tih thu an tarlang.

MNF chuan, minister Robert Romawia Royte, MLA Zothantluanga, Rochhunga Ralte leh TC Pachhunga te bakah, kohhran upate leh rawngbawltute'n December 10, 2021-a zanriah an kîl thlalak thehdarh a, zu nena chaw ei anga social media-a puhtu CT Lalthansanga s/o Sangkhuma Chhangte rang taka police-in an man chu chhuanawm an tih thu an sawi a, "Pu Zoramthanga chief minister hnuaiah danin a kawng a zawh dik zel hi lawmawm kan ti tak zet," an ti.

Police Cyber Crime Branch-a FIR thehluh leh police-in CT Lalthansanga an man vanga Congress party mite chêt dan chu 'Kan party mi a nia' tih vang hrim hrim nia a lan thu leh, Congress party-in police-te demna atana an hmang chu zialo an tih thu an tarlang.

Dan bawhchhetuin minister private secretary H Zothansanga, kohhran upa chunga FIR awmze nei lo Congress lamin an thehlut ve tih sawiin MNF chuan, "Kohhran upa zahawm tak man tura Congress party-in an phût phei hi chu an ti mak tak zet a, MNF chuan kan ngai thiam lo tak zet a, Congress-in kohhrana rawngbawltu pawimawhte bawk an bei leh ta mai hi pawi kan ti," an ti.

MNF chuan, kohhran leh tlawmngai pawlte duh dana sorkarin zu a khap chu lawmawm an tih thu an sawi a; zu khap chungchangah sorkar ṭawiawm turin Mizoram mipui an ngen nghal a ni.