MKHC-in sipai chêt dan an dem

Mizoram Kohhran Hruaitute Committee (MKHC) chuan thuchhuah siamin, Armed Forces Special Powers Act (AFSPA) chu harsatna chingfeltu a nih loh avang leh nasa taka hman sual ṭhin a nih avangin hmarchhak state-te aṭanga nuaibo an phût thu an tarlang.

MKHC chuan, "AFSPA hi North East India harsatna chingfeltu a ni lo a, he lai biala mipui tithlabártu leh mihring dikna chanvo (human right) palzûtna hmanrua atan hun dangah pawh nasa takin hmansual a lo ni tawh ṭhin. AFSPA hi NE India aṭang hian nuaibo kan phût tlat a ni," an ti.

Nagaland-a Mon district-a December 4 & 5, 2021-a thil thleng chu an dem thu sawiin MKHC chuan, "Security force-te'n pawisawi lo mi 13 lai nunna hlu tak an laksak hi kan dem tak zet," an ti a; "He state-a remna thlentu tur leh rálmuang taka khua leh tuite veng him tura awm ni zawk site rapthlak leh rin phâk baka an chêtna hi kan dem tak zet a ni," tiin, lusûn chhungte an tawrhpui tak zet thu an tarlang.

MKHC chuan, Mon district-a thil thlenga mawhphurtute chungah dan anga hma la tur leh a na thei ang bera hrem an phût thu sawiin, "Thi ta chhungte hnenah a tam thei ang ber zangnadawmna pek ngei kan phût tlat bawk a ni," an ti.