Vawiinah khaw 9-ah sikul leh pisa khâr dawn ; Tiamchin awm loin kawngpui dan a ni dawn
Mizoram Government Lumpsum Aided Higher Secondary School Association (MIGLAHSSA), School Managing Board leh Joint SU-te'n lumpsum higher secondary school (HSS) pakuate adhoc grant-in-aid dinhmuna hlángkai tura Mizoram sorkar an phûtnaah, sorkar thu an ngaihchàn hun chu nimin khan a a tawp a; thu lawmawm an dawn loh avangin vawiin aṭangin tiam chin awm loin sikul awmna khua ṭheuhah zirna-in leh sorkar pisa zawng zawng khâr dawn bakah, kawngpui an dang dawn.
Vanglaini palai zawhna chhangin MIGLAHSSA general secretary R Lalfakawma chuan, an thil phûtah hian nimin tlai thleng khan sorkar aṭangin thu lawmawm an dawn tâk loh thu a sawi a, "Kan lo hriat danin, nimin (Thawhlehni) khan Congress Legislature Party (CLP) an ṭhu a, kan chungchang pawh rei tak an khel a, mahse, kan thil phût hi an remti ta lo niin kan hria," a ti.
R Lalfakawma chuan, tiam chin awm loa an khua ṭheuha sikul leh sorkar pisa zawng zawng khâr leh kawngpui dan chu vawiin zing dar 6-ah an ṭan dawn thu a sawi a; an hmalakna tur chu lumpsum aided HSS pakuaa principal te, managing board hotute leh khaw pakuaa Joint SU-te'n July 19, 2018-a an meeting-a thutlukna an siam anga tih a nih tur thu a sawi bawk.
MIGLAHSSA General Secretary sawi danin, lumpsum aided HSS awmna khaw pakuaa Joint SU hruaitute'n July 23, Thawhṭanni khan School Education Secretary an hmu a; Secretary chuan, adhoc grant-in-aid dinhmuna hlankai chu a tih theih a nih loh thu leh School Education Minister leh Finance Minister-te thu a nih thu a lo hrilh. Minister-te a lo sawipui tur thu a sawi bawk rualin, sikul hawng leh phawt turin a lo ngen a ni.
Sikul leh sorkar pisa khâr leh kawngpui dan tur chungchangah hian Joint SU chuan thuchhuah siamin, "Tun thlenga sorkar aṭanga thu lawmawm kan dawn tâk loh avangin July 26, Ningani zing dar 6 aṭangin khaw hrang hranga sorkar office (damdawi-in tih loh) leh zirna in zawng zawng khâr a ni dawn a, khaw pakuate paltlangtu kawngte pawh tiamchin awm loa dan a ni ang," an ti.
Joint SU chuan, an hmalakna chungchangah sorkar pisa dawr ṭhintute leh mipui hriatthiamna leh thlâwpna an ngen a; kawngpui an dan dawn avangin, kaltlang tum lui lo turin mi tin an ngen bawk.
Tarlan tawh angin, lumpsum aided HSS pakuate adhoc aided-a dah phût vang hian sikul pakua - Tuisualral HSS, Phullen HSS, Farkawn HSS, NE Khawdungsei HSS, East Lungdar HSS, Thingsulthliah HSS, Zobawk HSS, West Phaileng HSS leh Zawlnuam HSS-te chu June 18, 2018 aṭangin khâr ṭan a ni a; sikul chawlh pangngai tel loin ni 27 chhung an khâr tawh a, sikul pakuaa zirlai 850 velin first term an exam ve theih loh phah a ni.