Mizoram Police-in cyber crime zirna an buatsaih

Mizoram Police-a CID (Crime) buatsaih ni thum awh tur, 'Cyber crime awareness prog­ramme for Mizoram sub-ordinate police officers' chu nimin khan Aizawl SP conference hall-ah IGP (Intelligence and Law & Order) LH Shanliana'n a hawng.

LH Shanliana chuan, cyber crime chungchang zirhona buatsaih a ni chu lawmawm a tih thu sawiin, "Tunlai thiamna sang zelin a ken tel cyber crime hmachhawn tura dan kengkawhtute puala programme buatsaih a ni hi cyber criminal ho chhui chhuahna atan thil ṭangkai tak a ni,” a ti a; misualte'n cyber crime an kalpui dante zir chian a, beih lêt dan tur kawng hriat a pawimawh thu a sawi.

IGP chuan, Mizo­ramah cyber crime a pun chak thu sawiin, "Police-te hian kan khawl neih ṭha tak takte leh technology thar hrang hrangte hi kan hmelhriat a, kan zir chian a, a nihna tur ang taka kan hman chhuah theihna turin thiamna kan neih a ṭul a ni," a ti.

Kum 2014-a CID (Crime) hnuaiah Cyber Cell dinte chu Cyber Police Station-a tichangtlung turin sorkarin hma a lak mek thu sawiin IGP chuan, "Tunah hian sorkar laipui aṭangin Cyber Crime Prevention Against Women and Children (CCPWC) hnuaiah cheng nuai 148 hmuh a ni tawh," a ti a; kumin chhung ngeiin cyber forensic laboratory leh cyber training centre din tum a nih thu a sawi.

Training hawnna inkhawm hi CID (Crime) SP Zosangliana'n a kai­hruai a, CID (Crime) deputy SP F Lalthla­muana'n training neih dan tur a sawifiah. Training-ah hian police inspector pahnih, sub-inspector 12 leh assistant sub-inspector 12 an tel a ni.