Hmasawnna atan Hindi thiam a pawimawh - Chief Minister

26th July, 2018

Mizoram Hindi Training College (MHTC) chuan nimin khan an college-ah zirlai thar lawmna an buatsaihah chief minister Lal Thanhawla chu khuallian a ni a; thu sawiin, India rama cheng nih chuan hmasawnna atan Hindi thiam a pawimawh thu a sawi.

Chief Minister chuan, India khua leh tui tan Hindi thiam a pawimawh tih sawiin, "Ṭhangthar zingah a pawimawhna hria leh thiam duh an awm zel hi a lawmawm hle. Hnam dang zinga awm nikhuain ṭawng hriat thiam loh chuan inkiltawih a awl thei viau a, chu chu hmasawn theihna laka min dâltu a nih avangin ṭawng thiam a pawimawh," ati.

Lal Thanhawla chuan, India ram chhungah Hindi thiamte tan thil tih a awlsam thu sawiin, "Hindia thiam hian mahni mimal thiamna leh eizawnna kawngah pawh hmasawn a awl phah a ni," a ti a; Mizoram sorkarin Hindi thiamna kawnga Mizoramin hma a sawn theih nan theihtawp chhuaha hma a lak thu a sawi.

MHTC zirlaite chu Mizoramah Hindi lama hmasawnna tipungtu an nih theihna atan theihtawp chhuah tura chahin CM Hawla chuan, "Kawng engkimah thiamna leh hriatna tipung tura beiin, an vela thil thlengte ngaihven a, mi rawn tlak leh vengva tak, mi dang zirtir chhawng thei tura mi hman tlak nih tum a pawimawh," a ti.

Zirlai thar lawm inkhawm hi Higher & Technical Education director Zarzosanga'n a kaihruai a, MHTC principal Dr Louis Hauhnar-in an college dinhmun a sawifiah.

MHTC hi October 15, 1975-ah Mizoram sorkar leh Central Institute of Hindi, Agra ṭangkawpin Mizoram Hindi Training Institute tiin an din a, a din chhan ber chu Hindi zirtirtute thiamna belhchhah a, a bik takin middle school-a Hindi zirtirtute'n ṭha zawka zirtirna an pek theih nan Hindi ziak leh ṭawng tihhmasawn a ni.

Kum 2003-ah MHTC hian National Council for Teachers' Education (NCTE), Bhubaneshwar Centre aṭangin phalna an hmu a, course leh syllabus zawng zawng pawh NCTE inkaihhruaina anga kalpui a ni. College-ah hian associate professor pahnih, assistant professor pasarih leh School Education department aṭanga dah (attached) lecturer pathum an awm mek a ni.