Covid-19 vei mi 123 an chhuak tawh
Mamit district-a Covid-19 hripui vei dam tawh pakhat chu nimin khan chhuahtir a ni a, heti hian hripui vei dam tawh chhuahtir zawng zawng chu mi 123 an ni. Mamit district-a Covid-19 vei dam tawh nimina chhuahtir hi enkawlna Covid Care Centre (CCC) - SSA Girls Hostel, Mamit aṭangin chhuahtir a ni. Mamit district-ah hian hripui vei mi 20 hmuh chhuah a ni tawh a, chu'ng zinga 10 chu damin chhuahtir tawh an ni a, vei hnua endik nawnnaa negative tih finfiah tawh mi dang pathum leh tun thlenga la positive mi pasarih an awm.
Heti hian Mizorama Covid-19 vei hmuh chhuah tawh mi 160 zinga 123 chu dam taka chhuaktir an ni tawh a, 76.87% a tling. Covid-19 vei, endik nawnnaa vei tawh lo hmuh chhuah tawh zat chu mi 132 (82.50%) an ni thung.
Tun thlengin Hnahthial district-a Covid-19 vei hmuh chhuah an la awm lo a, Kolasib, Serchhip, Lawngtlai leh Saitual district-ah positive an awm tawh lo bawk.