MLA-in hna thawhna hmun a tlawh

Hrangturzo bialtu MLA Vanlal­awmpuii Chawngthu, minister of state chuan nimin khan an bial chhunga hmasawnna hna thawhna hmunte tlawh a, hna thawktute a kâwm.

Vanlalawmpuii Chawngthu hian Keiṭum leh Khawlailung inkara Tuichâng lei dawh thar tura hna thawh mek tlawhin, hna enkawltu engineer-te leh hna thawktute chu a kâwm a; lei chu Tuichang chhak lama mipui zawng zawngte châk lakna kawngpui ber, lei pawimawh tak a nihzia hria a, a hun taka zo ngei turin a hrilh.

Tuichang aṭang hian Vanlal­awm­puii hian Khankawn aṭanga Lungchhuan panna kawngpui siam hna thawh mek a tlawh a, hmalak tawh chin leh hmabak la awmte thawktute nen an sawiho.

Vanlalawmpuii Chawngthu hian North Vanlalphai Tolrist Lodge-ah N. Vanlaiphai Civil SDO huam chhunga sorkar department hrang hranga thawktute nen a bial chhunga hna thawh kal lai mekte leh hmachhawp awmte a sawipui a; sorkar hnathawkte chu mipuite tana thawk, mipuite vanga awm an nihzia hria a, an hna thawh tinrengah complaint ngai lo, ûm zui ngai lo leh rinawm taka thawk ṭhin turin a fuih a ni.