Mizorama Bru-te'n an thil phûtte Union Home Minister-ah an thawn

Tripura aṭanga Mizo­rama lêt tawh Mizoram Bru-te intêl khawmna, Equal Package Demand Committee (EPDC) chuan July 24, Thawhlehni khan Union Home minister Rajnath Singh hnenah lehkha an thawn a; Tripura relief camp aṭanga Mizorama Bru lak let turte dawn tur ang dawn ve an phût thu leh August 14, 2018 hmaa pek ve an phût thu an tarlang.

EPDC hian Ministry of Home Affairs, Mizoram sorkar, Tripura sorkar leh Mizoram Bru Displaced People's Forum (MBDPF) ten Tripura relief camp-a Bru-te Mizorama hruai kîr an nih theihna atana inremna an ziak chu lawmawm an tih thu Rajnath Singh-a hnenah an thlen a, "Tluang tak leh ṭha taka hruai kîr hna thawh ni ngei se kan duh," an ti.

Kum 2010 aṭangin relief camp aṭangin Bru chhungkaw 1,700 chuang Mizoramah kîr tawh thu tarlangin EPDC chuan, "Chhungkaw tin Rs. 80,000 leh kum khat atan free ration pek an ni. Bru lêt tawhte hi an khawsak a harsa hlawm hle," an ti a; chhungkaw tinte chuan lo neih bak sum lak luhna dang an neih loh thu an tarlang.

EPDC chuan, Bru hruai kîr leh turte dawn ang dawn ve ngei an phût thu tarlangin, "Kan thil phûtte hi August 14, 2018 hma ngeia tihhlawhtlin kan phût a ni. Tihhlawhtlin a nih loh chuan duh thlan tur dang kan nei lo a, hruai kîr hna thawh tur hi kan boycott ang," an ti.

EPDC hian Union Home Minister hnena an lehkhathawn copy hi Union Home Secretary, MHA Special Secretary, MHA Adviser, MHA Joint Secretary (North East) leh Mizoram Home Secretary-te an pe bawk.