India rama district fai ber kan ni thei - Serchhip DC

UDPA department-in Khawpui Fai Inelna 2018 an buatsaih meka Serchhip district tana beihpui thlakna chu nimin khan Serchhip district bawrhsap Sangchhin Chinzah-in DC conference hall-ah a hawng a; Serchhip district chu India ram literacy rate sanna ber district a nih thu sawiin, "District fai ber pawh kan ni thei ngei ang," a ti.

Inkhawm hi Serchhipa UDPA officer Vanthangpuii'n a kaihruai a; Serchhip DC chuan, nikuma district fai inel­naah Mizoram district pariat zinga Serchhip district chu parukna a nih thu sawiin, "A tlàwm thlak hle. Nimahsela, kha ta ṭang khan Serchhip mipuite'n harh tharna changin kan han intuaifai chho a, Swachh Survekshan hmalakna hnuaiah Inrinni tin chu tual phiah ní-ah puan a nih bakah, kawng hrang hrangin faina kawngah hmalak a ni," a ti a; Swachh Survekshan 2018 Northeast Zone-a khawpui 220 zingah Serchhip chu 23-na a nih thu a sawi.

Sangchhin Chinzah chuan, khaw fai inelnaah Serchhip chu pakhatna a nih ngei theih nan nasa zawka thawh chhunzawm a ṭul thu sawiin, "India rama district literacy rate sang ber Serchhip district hian district fai ber nihna pawh kan nei thei ngei ang. Nikum lama kan mark paihtu Serchhip paltlang NH 54-in side drain a nei lo kha a ni a, kuminah chuan Serchhipa officer awmte thawhlawm Rs. 80,000 vel leh Sanitation Task Force aṭanga sum kan hmuhte aṭangin side drain laih chhuah vek kan tum a ni," a ti.