MIGASA an mangang, adhoc aided an phût

Mizoram Government Aided School Association (MIGASA) chuan thuchhuah siamin, hun rei tak chhung adhoc grant-in-aid dinhmuna hláng kai tura sorkar an ngenna tun thlenga chanchin lawmawm hriat tur a la awm loh chu pawi an tih thu leh, an mangan tak zet tawh thu an tarlang.

MIGASA chuan, lumpsum aided higher secondary school-te'n ni 25 chhung sikul khâra sorkar an ngen chunga sorkar a la ngawi reng chu pawi an tih thu sawiin, "Lumpsum HSS pakuate hi adhoc status-a dah an nih ngei kan beiseipui a, âwm pawh kan ti hle a, an hmalaknate kan thláwp tlat a ni," an ti a; lumpsum school-te chu kum 10 chhung lumpsum-a awm tawhte an nih thu leh, kum 10 chhungin lumpsum grant an dawn chu vawi khatmah tihpun a nih loh thu an sawi.

Mimal sikul liau liau (purely private school) eng emaw zat chu MIzoram sorkar­in lumpsum-ah dah a tum nia an hriat thu sawiin MIGASA chuan, "A lawmawm kan tih rualin, keini kum 20 dáwn khawtlangin a lo enkawl tawh leh kum 10 lai lumpsum status-a awm tawhte min khawih danglam lo a, purely private school ṭhahnem tak, sikul dinna pawh la rei lo tak takte nen ang khata min hrût rual tumna awm niin kan hria. Hetiang hi thil thleng ngai lo a ni a, kan sorkar hi ruahmanna thar siam ngei tur leh hetianga kalpui lo turin kan ngen nawn leh a ni," an ti.

Lumpsum school-a zirtirtute chu sorkarin a hnathawk anga a ngaihte leh a chhawr mekte an ni tih sawiin, "Kum 10 chhung booth Level officer-a a hman tawh te, registrar of birth & deaths and marriages, V/C elecion-a RO leh PO-a a hman ṭhinte leh census enumerator thlenga a chhawr ṭhin leh chhawr mekte kan ni," an ti a; an dinhmun chu sorkarin a ennawnsak ve tawh ngei an beisei thu an sawi.

MIGASA tarlan danin, tun hnaia MIGASA General Assembly chuan, "July 2018 chhung sorkar ngaihchàn ni se, thu lawmawm kan dawn loh chuan 'No Teaching Day' hman leh a ṭul chuan sikul khâr chhunzawm ni se," tiin an rel a; an thil phût chu tihhlawhtling ngei turin Mizoram sorkar an phût a ni.