Mizoramah sorkar ṭha a awm - Congress

Congress party chuan thuchhuah siamin, Bengaluru (Bangalore)-a Public Affairs Centre-in India rama state hrang hranga sorkar ṭha (good governance) an tehna, Public Affairs Index (PAI) 2017 result, tun hnaia tihchhuah­ah Mizoram chu state tê zingah pathumna a niin an tarlang a; hei hian Mizorama Congress kaihhruai sor­karah rorelna ṭha a awm tih a lantir niin an sawi.

MPCC tarlan danin, Public Affairs Centre hi miril leh ngaihtuahna sêng tak takte awmna, hlâwk tumna nei loa kal an ni a; kum 2016 aṭangin PAI an tichhuak ṭan a, PAI 2017 chu a vawi hnihna niin, tehna 10 hmangin state hrang hrangte an teh a ni.

Public Affairs Centre PAI 2017-ah hian mi nuai 200 aia tlem awmna chu state têa chhiar an ni a, nuai 200 aia tam awmna chu state lian an ni. State tê zingah hian Mizoram chu pathumna niin, Himachal Pradesh leh Goa-te chu pakhatna leh pahnihna an ni a; state lian zingah Kerela chu pakhatna niin, Tamil Nadu leh Telangana chu pa­hnihna leh pathumna an ni.

Congress pary chuan, Public Affairs Centre-in Mizoram chu sorkar rorelna ṭha neia a puang chu lawm­awm an tih thu sawiin, "MPCC president leh chief minister Pu Lal Thanhawla kaihhruai sorkar hi opposition-te’n kawng hrang hrangin sawisel ṭhin mah se, ṭan lam nei lo, a lai taka thil thlir ṭhintu páwn lam miin min rawn hmuh dan hi hnial rual a ni lo," an ti a; Mizo mipuiin Congress sorkarah rorelna ṭha an dawng niin an sawi.