MZP-in thawhlawm an khawn

MZP chuan March thlaa Bairabi Zophaia chawlhbûk sak an tumnaa Assam police-te'n an bungrua an tihchhiatte man hû hmuh let nan nimin aṭang khan Aizawl­ah thawhlawm an khawn ṭan a; MZP pisa conference hall-ah a hawnna inkhawm buatsaih a ni.

MZP president L Ram­dinliana Ren­thlei chuan chuan Zofate Chawlhbuk sakna bung­rua kha MZP bungrua chauh a ni lo tih sawiin, "Zofate Chawlhbuk sak a mi tlawmngai hnatlang bungraw thahnem tak a tel a ni. Bairabi YMA bungrua te, Bairabi MHIP bungrua te kha a kangral vek a, MZP chuan a rulhna tur kan nei lo a ni," a ti.

A compensation chhut danah sawisel neuh neuh a awm tih an hriat thu sawiin MZP President chuan, "Kha compensation kha draft a ni a, sorkar lamin a hun khan hmanhmawh taka thehlut tura min tih angin thehluh a ni a, tih dik tawk loh leh felfai lo deuh a lo awm pawh a ni mai thei," a ti a, an draft ai khan a tak tak an chan chu a tam zawk tur thu a sawi.

L Ramdinliana chuan MZP chu a dinna ngaihah a la ding reng tih sawiin, "Kan ram humhalh nana Zofate Chawlhbuk sak hi kan la tum reng a, ramri chungchangah hian nasa lehzualin hma kan la chhunzawm zel dawn a ni," a ti.

MZP hian thawhlawm hi Mizo mipuite bakah, Mizorama private bank, supply company, kawng siamtu company, cement company leh Tele-communication network company zawng zawngah khawn an tum a; Aizawl bakah, Mizoram hmun hrang hrangah khawn an tum bawk a ni.