MJA hruaitu thar puang chhuak Hruaitu ngai vek an ring tlang dawn

MJA Gen.Hqrs hruaitu thar puan chhuahna hun chu Aizawl Press Club-ah hman a ni a, hun khatna chu president Zonunsanga Khiangte-in a kaihruai. General secretary Zohmingmawia'n kum 2018-20 report a pe a, treasu­rer C Lalhmachhuana'n sum dinhmun a tarlang. Kum 2019-a MJA General Conference leh nimin inkara MJA member thi mi pangate sùnna hun hman a ni bawk.

Hun hnihnaah MJA president hlui Vanlalrema Vantawl, ex-officio-in kum 2020-2022 chhunga MJA Gen. Hqrs. hruaitu turte a puang a, President tharin thu a sawi.

MJA president Zonunsanga Khiangte chuan, "Tuna hruaitute hi mi fel leh ṭha ber thlan khawm kan ni lo a, mi tling lo tak takte kan ni. Kan inṭawiàwmna zawng zawngah lawmthu ka sawi a, term tharah pawh ṭha taka inṭawiawm leh turin ka sawm che u a ni," a ti a; hruaitute tlin lohnaah hnung lam aṭanga inrél mai lo a, hmaichhana infinchhuaha ṭangrual zâwk turin MJA member-te a sáwm.

President chuan, Covid-19 léng chu journalist-te'n an tuar hle tih sawiin, a bikin print media-te'n an tawrh zual thu leh, ṭhenkhat tan phei chuan an dingchhuak leh thei ang em tih pawh hriat a har tawh thu a sawi a; hripui lakah Mizorama journalist-te zinga 99% chu an la him nia a lan thu leh, a kái chhun pawh rei enkawl ngai loin dam taka a chhuah leh tawh thu a sawi a ni.

MJA President hian Com­mittee member a ruat belh theih (nominated) panga zinga hmun pakhat la âwl luah khattu tur a puang nghal bawk.

MJA hian kumin March 26 khan General Conference hman an tum a, chu chu kum 2020-2022 chhunga hruaitu tur thlan hun pangngai a ni. Covid-19 laka invènna atan sorkarin inkhàrkhip a puan tâk avangin, tun thlengin inkhawmpui an hmang thei lo a, hruaitu thar tur pawh thlan theih a ni lo.

Inthlan theih a nih tak loh avang hian district tin MJA-te ràwn hnuah leh Gen.Hqrs Executive Committee-in a rêl angin, kum 2018-2020 chhunga hruaitute chu kum 2020-2022 chhung hruaitu ni zui turin an ti ta a ni.