KHAWTHLIR

Nimin khan ZMC Covid-19 Laboratory-ah swab sample 300 chuang endik a ni a, nizan khan result a chhuah theih beisei a ni. Sample endikte hi State Referral Hospital-a awm sate bakah, district pali - Aizawl, Lunglei, Champhai leh Khawzawl aṭanga an dawnte a ni. June 30, Thawhlehni khan Lunglei Civil Hospital laboratory-ah Truenat khawlin swab sample 22 endik a ni a, Covid-19 vei an awm lo.

Champhai Bethel Branch KṬP chuan nimin khan thisen pêk rûnpui an huaihawt a, Champhai District Hospital tan thisen unit 32 an pe a, petute mila 23 leh hmeichhia pakua an ni.

Covid-19 léng vanga ramri vêngtute zinga mi, chetsual vang leh natnain a tlâkbuak vanga thi ta H Lalvenmawii, Sangau, Lalpianvula, Zawlnuam Bawrai leh Nelson K Beizachhi, Khopaite ràlna atana Aizawla YMA branch-te'n Central YMA-a an thawh khawm Rs. 1,29,300 leh CYMA-in a thawh belh Rs. 30,000-te chu nimin khan Central YLA, MṬP leh Langkaih Group YMA account-ah an thun.

Palak bialtu MLA KT Rokhaw chuan nimin khan Maraland Gospel Centenary Hospital, Siaha hnenah ambulance, PPE pasarih, hmai tuamna 200 leh hand sanitiser bûr 15 a pe. KT Rokhaw chuan, MLA fund aṭangin a bial chauh ni lo, Mara ram pumpui tana a tih ve theih tur a ngaihtuah thu sawiin, "Maraland Gospel Centenary Hospital tana ambulance pek hi a lo lang a ni," a ti.

Covid-19 léng vanga ramria duty, damlohna vanga thi Nelson K Beizachhi (19), Khopai, Siaha district chhungte hnenah Mara Thyatli Py (MTP) headquarters leh MTP sub-headquarters parukte'n June 30, Thawhlehni khan ràl an hlân. MTP Hqrs. kal­tlanga ràlna sum tlingkhawm hi Rs. 5,60,170 a ni a; MTP sub-hqrs. paruk aṭangin sumfai bakah, tuizem leh belpui pek a ni.

NCC Mizoram Independent Company chuan nimin khan Aizawl traffic police leh traffic point hrang hranga duty-te hnenah ei tur an sem. NCC commanding officer Col. Gurpreet Singh chuan, an thil tih chu Covid-19 laka mipui an him theihna tura hah taka thawkte an puih theihna kawng khat a nih thu a sawi.

Lawngtlai District Rural Development Agency (DRDA) chuan Pradhan Mantri Awaas Yojana - Gramin (PMAY-G) leh Mahatma Gandhi National Rural Employment Guarantee Act (MGNREGA) hnuaia kum 2019-20 chhunga an district-a DRDA pisa leh block tina hna thawk ṭha field level worker-te hnenah nimin khan chawimawina an hlân.

State Referral Hospital (SRH)-ah Covid-19 vei rinhlelh thilah mi pakhat dah luh a ni a, nimin vek khan a swab sample endik nghal a ni. SRH-ah hian Covid-19 vei mi pasarih enkawl mek an ni a, Aizawl mi vek niin, mipa pahnih leh hmei­chhia panga, kum 3 aṭanga 57 inkar an ni. Covid-19 vei enkawl mekte hi an vaiin Isolation Ward-ah an awm a, harsatna lian tham an nei lo a, chhuahtir thuai theih beisei a ni. SRH-ah hian Covid-19 vei enkawl tawh zawng zawng chu mi 54 an ni a, mi 47 an chhuak tawh.