Thu leh Hla Kûtpui hmang

Mizo Writer Asso­ciation (MWA) chuan nimin khan Art & Culture director R Hming­thanzuala hoin a pisa-ah 'Thu leh Hla Kûtpui' an hmang a, MWA Award an sem nghal.

R Hmingthanzuala chuan, thuziak mite chuan mi beidawngte an kai harh a, beiseina nung an siamsak thei tih sawiin, "Ziakmite mawhphurhna leh pawimawhna a sang hle. Mizo ṭawng dik humhalh zel pawh a pawimawh a, ṭawng a bo chuan hnam bo kan ni mai dawn. MWA hmalakna hi a pawimawh hle a ni," a ti.

Ziakmite chu mi chungnung an nih thu sawiin Art & Culture Director chuan, "Talent ropui tak nei an ni a, talent tipung zel tura ṭan lak a pawimawh. Ziakmite chuan thinlung hel pawh nun kawng dikah an hruai lut thei a ni," a ti a; Art & Culture department chu neitu rilru pua tlawh ṭhin turin Mizoram mipui a sáwm.

MWA hian Mizoram University hnuaia B.A final (Mizo)-a ti ṭha ber Lalneihmawii, Pachhunga University College (PUC) hnenah R Buchhawna Proficiency Prize an hlàn a; M.A (Mizo) final-a ti ṭha ber Thang Sian Tluang, PUC hnenah J Malsawma Proficiency Award hlanin, Mizo Literary Award chu 'Krista rilru' tih phuahtu T Romama, Serchhip hnenah hlan a ni bawk.