Kum 131-a upa Aizawl DC pisa kâng chhui tur magisterial inquiry din dawn

Aizawl Bawrhsap Pisapui chu nimin zing dar 3:15 vel khan a kâng a, in eng emaw zat a kâng ral. Pisa kan chhan hriat a ni lo a, a kan chhan chhui chiangtu tur magisterial inquiry din a ni dawn. Pisapui hi kum 1890-ah luah ṭan a ni a, kum 131-a upa a ni.

Bawrhsap Pisapui kan thu hi police duty-te'n zing 3:15 velah hriain, Fire & Emergency Service department an hriattir a ni. Kâng ṭhelh pawlte an thlen chuan a lo kâng nasa tawh a, chuvangin ṭhelh mih mai theih a ni lo. Pisapui ber leh a bul vela Assam type in dangte a kâng ral a, in ṭhenkhat a kâng kai lo thung.

Zing dar 6:30 velah kâng nasa zualpui ṭhelh mit ni mah se, mût tâwk a awm reng avangin kâng ṭhelh pawlte'n an vil nileng a, tlai thlengin tuiin an phuh a ni.

Aizawl DC pisa a kâng tih hriat a nih hnuah Disaster Management & Rehabilitation (DMR) minister Lalchamliana, Assembly deputy speaker Lalrinawma, minister of state pahnih Lalruatkima leh Robert Romawia Royte, chief secretary Renu Sharma leh sorkar official dangte'n kângmei chhuahna an pan a, Aizawl SP pisaah hmalak dan tur an sawiho nghal.

DMR Minister chuan, Aizawl Bawrhsap Pisapui kan chhan chhui turin magisterial inquiry lak a nih tur thu sawiin, "Aizawl DC pisa hi hna pawimawh tak tak khawihtu an nih avangin rang taka an insuan luh lailâwk dan tur ngaihtuah a ni a, Khatla-a Old MLA Hostel-ah eng emaw chen suan luh an ni ang," a ti.

Aizawl DC Dr Lalhriatzuali Ralte chuan, chhiatna rapthlak tak thleng avangin Aizawl DC pisa chu dàwr theih a ni dawn lo tih sawiin, "Kan dinhmun hriat chian hnuah mipui tana dawr theih an nih hun tur a hriat chauh dawn," a ti a, mipui hriatthiamna a ngen. Bawrhsap pisa hi kumin Krismas hma chuan dàwr theih a ni dawn lo tih nimin tlai khan DC-in a tarlang.

Police hotute sawi danin, Aizawl DC pisa hi zing dar 3:15 velah Election Branch aṭangin a kâng ṭan a, zing dar 4:10-ah Fire & Emergency Service hriattir chauh a ni.

Bawrhsap Pisapuia document hluite chu digitisation kalpui mekah record leh lehkha hlui zual, DC Archive Room-a dah zinga 95% vel chu digitise hman a ni a; mahse, tun hnaia record leh lehkha pawimawhte chu a kâng ral vek thung.

Kângmei chhuak avang hian Bawrhsap pisaa Election Branch, Planning Branch, Arms Branch, ILP Branch, Census Branch, Establishment, Nazir, DC Office chamber, Additional DC office chamber pahnih leh SDO(Sadar) office chamber a kâng ral a; District Emergency Centre leh hmâr lama office ṭhenkhat (RCC leh Assam type)-te chu a kâng kai lo a ni.

Bawrhsap Pisapui
10 Kum 1870-a hawn Tlabung Post Office dawta Mizorama pisa awm hmasa ber a ni.
2) Bawrhsap Pisapui ber (DC ṭhutna) chu INATCH-in heritage building-a an puan tawh a ni.
3) Bawrhsap Pisapui hi April 22, 1890-ah North Lushai Hills political officer Capt. HR Browne-a'n a luah ṭan a, chutih lai chuan DC chu political officer tih a ni.
40 Political officer tih ṭhin chu DC tih a nih hnua pisa luah hmasa bertu chu SN Barkataki a ni.