Sorkar ṭha siam turin theihtawp kan chhuah dawn - Lalsawta

Mizoram Pradesh Congress Committee (MPCC) president Lal Thanhawla chuan nimin khan Congress Bhavan-ah MPCC president thar Lalsawta hnenah president nihna a hlân. Lalsawta chuan, sorkar ṭha siam turin theihtawp an chhuah dawn tih a sawi.

MPCC president thar Lalsawta chuan, ṭhat loh theih lohna báwm a sawi ṭhin chu sorkar ṭha tihna a nih thu sawiin, "Sorkar ṭhaah chuan mipui an ṭha lo thei lo. Israel, Switzerland leh Singapore-ahte mipui an ṭha vek. Ram rorelna ṭhaah mi lian leh mi tê an awm thei lo a, inang pátin thil a kal ṭhin. Party pakhat chuan kalphung thar an sawi a, sawi zauna tur an hre lo," a ti.

Mizoram chu rûnin a awm nia sawiin Lalsawta chuan, "A damdawi awm chhun nia ka hriat chu sorkar ṭha neih a ni. Kum 2023-ah sorkar siam hrim hrim ni loin, sorkar ṭha siam turin theihtawp kan chhuah dawn," a ti a; kum 2023-ah ram kal dik lohna zawng zawng dang kir leh a, sorkar ṭha siampuiah mipui a sáwm.

Lalsawta chuan, mihring lei theih pahnih an awm thu sawiin, “Chu’ngte chu sal leh nawhchizuarte an ni. Sal leh nawhchizuar anga lei theiha min ngaitute chu ram hruaitu atan kan duhin ka ring lo. Lei theiha min ngaitute’n kan rama rorelna an chelh lohna turin dikna leh rinawmna te kan vawn nun zel a ngai,” a ti.

Congress President thar chuan, Aizawl, Lunglei, Champhai, Siaha thlengin mipuite’n an hmuh theih hmasawnna zawng zawng chu MPCC president chhuak ta Lal Thanhawla kutchhuak deuh vek niin a sawi bawk.

MPCC president chhuak ta Lal Thanhawla chuan, “President ka nihnaah hian ka term la hmang zo lo mah ila, hruaitu thar leh ṭha zawkte tan hmun ken a ngai tawh a ni tih hriain, tu nawrna mah tel loin ka chawlh tur thu hi ka OB-puite hnenah ka sawi tawh. Keima thutlukna liau liau a ni,” a ti a; Congress party aṭanga chhuak awm thin mah se, an lêt leh ṭhin niin a sawi.

Inkhawmah hian MPCC vice president atan Lal Thanzara leh treasurer atan Zodintluanga ruat an nih thu pawh official-a puan chhuah a ni.