NHM hnuaia thawkte an nuar ṭan

National Health Mission (NHM), Mizo­ram hnuaia thawkte chu Mizoram sorkara an lungawi loh avangin nimin aṭang khan tiam chin awm loin an nuar a, hna thawk loin an châwl.

National Health Mission Employees Union (NEUM) thurel angin NHM hnuaia thawkte hi an nuar a, Health department hnuaia hmun hrang hrang - damdawi-in (district hospital, CHC, PHC, SDH, urban PHC), sub-centre, health and wellness centre leh emergency service leh pisaa thawkte an ni a, an vaiin mi sang hnih chuang niin, an zingah damlo enkawltu doctor leh nurse-te pawh an tel.

NEUM chuan, “Kan chanvo leh hamṭhatna kan hmuh ve ngei theihna tura hetiang thlen a ngai ta hi pawi kan ti tak zet,” an ti a; anmahni leh an hnathawh mamawhtute chu hrethiam turin an ngen a ni.

Thu dawn danin, NHM hnuaia thawkte an nawrh avang hian Mizorama damdawi lama inenkawlnain harsatna a tawh phah a, Aizawl Civil Hospital-ah ringawt pawh NHM hnuaia thawk nurse 60 vel an awm a, damdawi-in dangahte pawh nurse leh doctor eng emaw zat an awm a ni.

NHM hnuaia thawk zingah hian doctor leh nurse-te bakah, health worker, laboratory technician, data entry operator, driver, group-D leh office lama thawktu dang eng emaw zat an tel a ni.

NEUM thil phûtte
 NHM hnuaia thawkte sorkarin a ngheta a lak thuai theihna tura Cabinet meeting-in a rang thei ang bera a ngaihtuah.
 NHM contract employee-te’n hun lo kal zel turah a hun taka hlawh an lak theihna turin NHM central share sum lo kalte Ministry of Health & Family Welfare kaihhruaina anga ni 15 ral hmain Finance department-in Health department-a a pek chhuah.
 Medical reimbursement pangngai hman ve.
 Health department hnuaia hna lak zawng zawngah NHM contractual staff-te an thawh tawhna leh rural posting weightage neihtir.