KHAWTHLIR

18th December, 2021

Thisen pe
Mizo Higher Secondary School NSS chuan nimin khan Aizawl Civil Hospital blood bank-ah thisen unit 55 an pe a, petute mipa 45 leh hmeichhia 10 an ni. Nimin vek khan KṬP, Kulikawn Branch chuan an hmunah thisen pek huaihawtin, mipa 33 leh hmeichhia pangate'n Aizawl Civil Hospital tan thisen unit 38 an pe a; KṬP, Kolasib Vengthar South Branch pawhin District Hospital tan Krismas pualin thisen unit ruk an pe bawk.

Sahuan khâr dawn
Deputy Conservator of Forest (Wildlife) chuan thuchhuah siamin, Krismas leh kum thar vuakvetah Aizawl Zoological Park (sahuan) khâr a ni dawn tih a puang. Aizawl Sahuan hi December 24-27 inkar leh December 31 bakah, January 1, 2022-ah khar a ni dawn a; kum 2022 aṭang chuan Pathianni apiangin khâr ṭhin a ni tawh dawn bawk.

By-election result
Aizawl Municipal Council (AMC) chhunga local council parukah December 16, Ningani khan by-election neih a ni a, zanah result puan a ni. Laipuitlang, Republic Veng leh Venghnuaiah MNF candidate an tling a, Tuithiang leh Zemabawkah ZPM candidate tlingin, Armed Vengah INC candidate a tling thung.

Covid-19 vangin 531 thi tawh
Nimin khan tlai dar 5 thlengin Covid-19 vangin mi pakhat a thi a; Mizoramah Covid-19 vangin mi 531 an thi tawh a, tun December thla bikah mi 34 an thi tawh.
Laldinpuii (42), ITI Veng, Aizawl chu hripui vangin nimin zing dar 2:10 khan State Refferal Hospital-ah a thi a, natna dang nei tel a ni. Covid-19 positive a ni tih December 13, 2021 khan hmuh chhuah a ni a, SRH-ah enkawl nghal a ni.

MTASA General Assembly
Mizoram Treasury Accounts Service Association (MTASA) chuan nimin khan Aijal Club-ah General Assembly vawi 17-na an hmang a; infuih tharna leh pisa dawrtute tana remchang zawka Treasury pisate hnathawh dan tur an sawiho bakah, hruaitu thar an thlang. MTASA inkhawmpuia tarlan danin, treasury service recruitment rules peih a la nih loh avangin hun rei tak chhung thawktu lak belh a ni lo a, an indaih lo hle. Tunah hian account officer 49 leh assistant account officer 29 an awm mek a, assistant account officer post ruak 44 a awm mek a ni.