Dy. CM hoin mipuiin Aizawl DC pisa An dàwr leh vat theih dan tur sawiho DC pisa atan Old MLA Hostel hmang dawn

Nimin khan deputy chief minister Tawnluia hoin a pisaah minister-te'n Aizawl DC pisa mipuite'n an dàwr leh thuai theih dan tur an sawiho a; Lalchamliana, K Lalrinliana, Lalchhandama Ralte, Dr K Beichhua, TJ Lanuntluanga leh Robert Romawia Royte te an tel. Aizawl DC pisa atan hian MLA hostel hlui hman lailawk a ni dawn.

Dy. Chief Minister chuan, Aizawl Bawrhsap Pisapui a kâng chu vanduaithlak a tih thu sawiin, "He lai hmun hi Mizoram hmunpui pawimawh, kan zavaia kan ngaihhlut a ni. Sorkarin Aizawl DC office an dàwr leh vat theih nan ruahmanna a siam nghal a, mipuite chî-âi lo turin ka ngen a ni," a ti.

Aizawl DC pisa lailâwk atan MLA hostel hlui chu nimin zing khan Legislative Assembly thuneitute leh PWD hotute'n an en nghal thu sawiin Tawnluia chuan, "A ṭul anga siam ngaite leh chei ngaite chu tih nghal a ni ang," a ti a; a rang thei ang bera Aizawl DC office chu a pangngaia mipuiin an dawr theih dan tur sorkarin a ngaih pawimawh thu a sawi.

Ṭhutkhawm hma hian Dy. Chief Minister hian Bawrhsap Pisapui kâng chu a tlawh a, Aizawl DC Dr Lalhriatzuali Ralte, Aizawl SP C Lalruaia leh Fire & Emergency Services hotute'n a hmunah an lo dawngsawng. Kângmeiin bungrua leh thil pawimawhte a tihchhiat dan an enho a ni.

Hetihlai hian, Assembly speaker Lalrinliana Sailo hoin nimin khan sorkar hotute'n Aizawl Bawrhsap pisa lailâwk atana hman turin Old MLA Hostel, Khatla an endik. Old MLA Hostel hi DC pisa turin sorkar department hrang hrangin an chei dawn.

Lalrinliana Sailo chuan, Aizawl Bawrhsap Pisapui kâng chu pawi a tih thu sawiin, "Zoram tana ro hlu tak a kâng fai hi chàna nasa tak a ni. Pisa atana hman lailâwk tura Old MLA Hostel kan nei remchang hi a vanneihthlak hle. Hun eng emaw chen chu an luah a ngai mai thei a, sorkar pisa zingah chuan mipuite'n an dawr tam berte zinga mi a nih avangin a hma thei ang bera pisa an hawn theih nan theihtawp chhuah tlân a ṭul," a ti.

Sorkar thuchhuah tarlan danin, Old MLA Hostel building hi chhâwng thum a ni a, pindan 14 (VIP room pahnih leh ordinary room 12), dining hall leh lounge pakhat ve ve a awm a; chu'ngte chu a ṭul anga siam rem a ni ang.

Old MLA Hostel hi Covid care centre atana sorkarin a puan lai a nih avangin hlihna thupek (de-notify) chhuah a ngai dawn bawk a ni.