IAS Hybrid Coaching exam result chhuak

Mizoram Youth Commission (MYC) chuan nimin khan mi 100 tana IAS Hybrid Coaching Scholarship exam result a tichhuak a; Aizawl centre aṭangin mi 60, Lunglei centre aṭangin mi 20 leh, Siaha centre leh Kolasib centre aṭangin mi 10 ve ve thlan an ni.

MYC chairman Dr Vanlalṭanpuia, MLA chuan, IAS coaching chu offline leh online-a kalpui tur a nih avangin hybrid tia hming vuah a nih thu a sawi a, “Sorkar hmalakna lian tak pakhat a ni. He mega scholarship programme atana mi 100 thlan chhuahte chu an centre-ah ṭheuh zirtir an ni ang a, centre ṭhutchilhtu tur dah a ni ang,” a ti.

All India services chu zan khat thil thuah hlawhtlin nghal har a ni tih sawiin Vanlalṭanpuia chuan, “Mimal dinhmun leh thiamna azir a ni a, MYC chuan exam atana ṭha taka an inbuatsaih theihna tura theihtawp chhuah saktu facilitator hna a thawk ber,” a ti a; Mizo ṭhalai zingah all India services exam a lâr tak vak loh avangin ṭhalaite sûkthlêk her danglam thei khawpa ṭan lak zel an tum thu a sawi.

MYC Chairman chuan, kum 2022-ah MYC kaltlangin Super 40 Programme kalpui tum a nih thu te, Mizo ṭhalaite’n lehkhabu ṭha an chhiar theih nan State Library-ah IAS Corner ruahman mek a nih thute a sawi bawk.

IAS Hybrid Coaching Scholarship exam result hi http://myc.mizoram.gov.in ah en theih a ni.