PM Modi avangin Mizoramin Ei leh barah harsatna a tâwk lo - BJP President Vanlalhmuaka

BJP, Mizoram Pradesh president Vanlalhmuaka chuan nimin khan Aizawl Press Club-ah thuthar thehdarhtute a kâwm a; prime minister Na­rendra Modi vangin Mizoramin ei leh barah harsatna a tawk lo niin a sawi.

Vanlalhmuaka chuan, Covid-19 vanga India ram pumah inkhàrkhip ṭan a nih aṭangin Prime Minister-in khua leh tuite rilṭáma an awm lohna tur leh sum hman turah harsatna an tawh lohna turin Pradhan Mantri Garaib Kalyan Yojna (PMGKY) hnuaiah cheng vbc. nuai 1,70,000 a pek chhuah nghal thu a tarlang.

PMGKY avangin Mizoramah pawh tun thlengin mi harsa zawkte'n ration an la thei a, a thlâwnin mi pakhat zelah buhfai kg. 5 thla tin pek ṭhin a nih thu sawiin Vanlalhmuaka chuan, "Chutiang chhungkua chuan thla tin dâl/chana kg. khat a thlawna dawngin, ei leh barah harsatna kan Prime Minister vangin kan tâwk lo a ni," a ti.

BJP President chuan, Na­rendra Modi-a'n June 30, 2020 khan PMGKY hnuaia free ration kalpui mek chu November 2020 thleng chhunzawm a nih tur thu a puang tih sawiin, "He free ration hi India khua leh tui mi vbc. 80 chuangin Covid-19 léng mek leh fûrpui kan tawn meka ei leh bara harsatna kan tawh lohna atan ruahman a ni," a ti a; sorkar laipui chuan PMGKY chu uluk taka kalpui turin state sorkar a hriattir tih a sawi.

June 30-a Prime Minister-in thuchah a sawi chu minute 16 chhung chiah a nih thu sawiin Vanlalhmuaka chuan, "Mah se, a thusawi chu India mipui vbc. 80 te tan thawvenna a ni. Miretheite chu kan VIP te tiin mipui hmaa a ka in sawi loh mah se, a thusawi leh a thil tihah India ram mipui vbc. 80 te chu a VIP dik takte an ni tih he 16 minute PM speech ah hian a lang ­chiang hle," a ti.