Industry atana kawlphetha lak man tihniam turin sorkar ngen tum

Mizoram Industry Owners’ Association (MIOA) chuan, Mizoramah industry din a nih dawnin kawlphetha hman tur pawh luhna man a to lutuk avanga an harsatna tawhte sorkarah thlen an rél.

MIOA hian tun hnai khan Zuangtui Industrial Estate-a factory intlawh tawnna leh hruaitu thar thlanna hun an buatsaih a; Mizoramah industry din a nih dawna power connection man to lutuk chu industry dintute tana harsatna lian tak siamtu a nih avangin, awlsam zawka power connection neih theih dan tur ngaihtuahpui turin Mizoram sorkarah thlen ni se, an ti a ni.

Kum 2020-21 chhunga sorkarin state insensitive subsidy cheng nuai 100 chuang ṭanpuina a pek avangin MIOA chuan sorkar chungah lawmthu an sawi a; kumin chhungin Covid-19 donaa thawktute leh ramri vengtu Mizoram police-te hnenah tui thianghlim in tur ûm nuai khat chuang an pawl sum sensoa an sem chhuak thei chu lawmawm an tih thu an sawi bawk.

MIOA hian kum 2022-2023 chhunga office bearer tur mi paruk an thlang a, president atan F Rodingliana (TK Tui Um) leh general secretary-ah Lalhriatpuia (Tuma Swan)-te an thlang a ni.