NHM-a thawkte nawrh vangin Covid-19 report a awm thei lo

December 16, Ningani khan Mizoramah Covid-19 vei mi 203 hmuh chhuah a ni. Nimin khan hripui vangin mi pakhat a thi a, NHM hnuaia thawkte an nawrh mek avangin hripui vanga dam tawh nimina chhuahtir zat hriat theih a la ni lo.

Covid-19 vei Ningania hmuh thar mi 203-te chu mipa 93 leh hmeichhia 110 an ni a; ZMC laboratory-ah mi 58, TrueNAT hmangin mi 17 , RAT hmangin mi 126 leh Fluorescent Immunoassay (FIA) hmangin mi pahnih hmuh chhuah a ni.

IDSP record angin, Mizoramah Covid-19 vei 1,39,227 hmuh chhuah a ni tawh a, mipa 67,166 leh hmeichhia 72,061 an ni a, mipa aiin hmeichhia 4,895-in an tam zawk.

National Health Mission (NHM) hnuaia thawktute nimin aṭangin an nuar a, hei vang hian nimin khan Covid-19 report siam theih a ni lo. Sorkar thuchhuak chuan, "NHM, Mizoram staff-te tiam chin awm loa an nawrh avangin Covid-19 discharge report dawn a ni lo a, report update theih hun tur hriat a ni lo," a ti a; vawiinah pawh Covid-19 vei nimina hmuh chhuah zat tih­chhuah theih a ni dawn lo nia thu dawn a ni.

December 16, Ningania Covid-19 vei hmuh thar mi 203 zingah symptom nei mi 82 an awm a, a tam zawk, mi 121 erawh chu symptom nei lo an ni. Ningania swab sample endikah positivity percentage 10% aia a sanna district pahnih chiah a awm a, Serchhip district-ah 16.04% leh Lawngtlai district-ah 11.54% a ni. Kolasib district-ah erawh chuan sample 343 endikah positive an awm lo a, Champhai district-ah sample endik a ni lo.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. December 15, 2021 thlenga swab sample endik tawh 14,78,403 aṭanga RT-PCR hmanga endik zat percentage chu 22.22 a ni a, RAT hmanga endik zat chu 71.90% a tling.

Kum 2011 chhiarpui aṭanga chhûtin, Mizorama Covid-19 vei hmuh tawh 1,39,227 chu mi 1,000 zelah hripui vei mi 127 an awm ang a ni a; mi 1,00,000 zela Covid-19 vangin mi 48 an thi tawh ang a ni tih sorkar thuchhuakin a tarlang.