Champhai dist-a Covid vaccine pek zingah Myanmar ráltlân 3,856 an tel

Champhai Dis­trict Task Force for Immunization chu nimin khan bawrhsap Maria CT Zuali hoa Champhai District Hospital-a ṭhukhawm chuan Covid-19 danna pek dan leh National Immunization Day 2022 chungchang an sawiho. Covid vaccine pek tawh zingah Myanmar ráltlân mi 3,856 an tel tih tarlan a ni.

Maria CT Zuali chuan, thingtlang mite hriselna a ṭhat tâwk loh thu sawiin, “Ngaihsak leh ngaihven reng an ngai. Hri danna leh damdawi ṭha ei a pawimawh a, hriselna tura mawhphurhna pawimawh tak chu nute koah a innghat,” a ti a; doctor-te chu khua leh tuite hriselna tura hna thawk an ni tih hre reng turin a chah.

Champhai chief medical officer Dr R Lianmawia tarlan danin, Champhai district-ah hri danna chi 11 pek mek a ni a, January 25, 2022 aṭangin kum 5 hnuai lam hnenah zenghri danna a ruala pe chhuak turin ruahman a ni.

Har Ghar Dastak Abhyan kaltlangin in tinah Covid-19 vaccine pek a ni a, vaccine la thei tura ngaih la la lo mi 3,004 an la awm. Covid-19 vaccine la lo mi 3,004 zinga 2,026 chu sakhuana leh chhan dang vanga la duh lo an ni a, mi 178 chu dam lohna avanga la lo an ni. Mi 159 chu hriaua inchiu hlau leh mi 641 chu chhan dang vanga la duh lote an ni bawk.

Covid-19 vaccine pek tawh zingah Myanmar aṭanga Mizorama ráltlân mi 3,856 an tel a, home leh jail-a pek mi 1,304 an awm bawk.

January 25, 2022-ah National Immunization Day pualin Intensified Pulse Polio Immu­nization (IPPI) neih tur a ni a, Champhai CMO-in a enkawl Champhai district ṭhen hran a nih hma huam chhunga transit point 10, vaccination boot 161 leh team member 483-te’n hri danna hi a rualin an pe chhuak dawn a ni.