Minister-in MCU inkhawmpui a hmanpui

Mizoram Consumers’ Union (MCU) Headquarters chuan nimin khan Horticulture conference hall-ah Annual General Meeting vawi 24-na an hmang a, Food, Civil Supplies and Consumer Affairs (FCSCA) minister K Lalrinliana’n a hmanpui.

K Lalrinliana chuan, FCSCA leh MCU chu thu khat vuaa mipui hamṭhat atan danin a phal chinah huaisen taka kal turin a chah a, “Petrol, diesel, khawnvartui, buhfai, LPG leh thil dang dangah pawlh dal, hralh rûk, tihchingpen, bûk tling lo leh consumer-te’n dikna chanvo an hloh theihna tur reng rengah a nihna tak chhui chhuak a, an tihsual chhunzawm lohna turin hmalak a ṭul,” a ti.

Legal Metrology tihchangtlun nan hma an la tih sawiin K Lalrinliana chuan, “Hmanrua pawh lak khawm zel a ni a, district thar pathumah office din tum niin Hnahthialah office sak zawh a ni tawh,” a ti a; Khawzawl leh Saituala office sakna tur sum pawh an neih tawh thu a sawi.

MCU inkhawmpui hi chawhma lamah an president Chawngsailova’n a kaihruai a, FCSCA secretary Zothanmawia leh director Ramdinliani ten thu an sawi. Chawhnuah hruaitu thar an thlan bakah ro an rél a ni.