ZPM-in movement anga kal zel an tum

Ṭangrual pawl, Zoram Peoples' Movement (ZPM) Steering Commi­ttee nimina an pisaa ṭhu­khawm chuan, ZPM chu movement anga la kal zel ṭha an tih thu an tarlang.

ZPM Steering Commi­ttee meeting hi chair­man Lalliansawta'n a kaihruai a; Lalliansawta chuan, ZPM movement chu Pa­thianin mal a sâwm tih sawiin, "Zoram hmun hrang hrangah Steering Committee a ding mawlh mawlh a, a lawmawm hle. Hetianga malsawmna dawng thei zel turin a chhunga awm, a thawktute hian Pathian malsawm tlakin i thawk zel ang u," a ti.

ZPM secretary gene­ral K Sapdanga'n Mizoram hmun hrang hranga ZPM dinhmun leh hmasawnnate a sawi a; ZPM Caucus thurêl sawiin, "ZPM hi movement angin a bul kan ṭan a, tun hunah pawh movement angin a la kal zel a, pawl pasarihte hian lungrual takin ZPM movement anga kal zel hi ṭha kan la ti a ni," a ti a; ZPM movement chuan nakin lawkah rah duhawm tak a neih ngei an beisei thu a sawi.