CM-in Lungdai HSS hawng
Lungdai Health Security Scheme (LHSS) chu nimin khan an khaw community hall-ah hawn a ni a, scheme hawngtu chief minister Lal Thanhawla chuan, hriselna atan chuan nun uluk leh faina a pawimawh thu a sawi.
Lal Thanhawla chuan, khawtlang duan chhuah Lungdai Health Security Scheme chu Mizoramah a awm vawi khatna nia a hriat thu sawiin, "Sorkar hnathawk awm lohna chhungkua leh health insurance-te nei ve lo tan a manhla lehzual dawn a, a thlamuanthlak hle dawn a ni. He scheme-ah hian ngaihtuahna fing a tel a, a entawntlakin a changkang hle a ni," a ti.
Inkhawmah hian Health minister Lal Thanzara leh bialtu MLA Hmingdailova Khiangte te pawhin thu an sawi a ni.
LHSS kalphung
. Lungdai khua mi leh sa job card, ration card leh Aadhaar-te behchhanin member inziah luh tur a ni.
. Member-te'n chhungkaw khat aiawha an sum chhûn khawm tur chu kum khatah Rs. 2,050 a ni.
. Damdawi-ina luh ngai damlo, hospital bill Rs. 60,000 pêlte chu Rs. 25,000 ṭanpuina pek tur a ni ang a, hospital bill Rs. 60,000 pel lote chu an senso aṭanga 30% ṭanpuina pek tur a ni thung. Case danglam bik a awmin Society Management Committee-in ṭha a tih angin a rel ṭhin ang.
. Sum thawhkhawm chu khawih chêt tur Rs. 2,00,000 vel dah hran a, a bak zawng chu a pung awmin bank-ah dah tur a ni.
. Sum chhûn khawm zat tura chhût chu cheng nuai 20 a ni a, a ṭul anga hnatlang emaw hmanga hlawh chhuah tura ruahman a ni bawk.